Naghuwat ang Metro Pacific Tollways Corporation (MPTC) kon unsay mga gikinahanglan alang sa terms of reference (TOR) nga ipagawas sa National Government may labot sa pagpadayon sa implementasyon sa Metro Cebu Expressway (MCE).
Si Engr. Allan Alfon, general manager sa Cebu-Cordova Link Expressway (CCLEX) nga sister company sa MPTC nga gipanag-iya ni business tycoon Manuel V. Pangilinan, nagkanayon nga nagpabilin ang interest sa MPTC pagtukod sa Cebu Expressway nga maoy magkonektar sa City of Naga sa south paingon sa Danao City sa north nga adunay 72 kilometros nga distansiya.
Samtang ang National Economic and Development Authority (Neda) niaprobar sa mga proyekto nga maoy priority sa administrasyon ni President Ferdinand Marcos ug usa niini mao ang expressway.
Ang MCE gisugdan og construct lima na ka tuig ang nakalabay nga magsilbing alternate route aron mapaspasan ang pagbiyahe nga dili na moagi sa Mandaue City ug lungsod sa Consolacion diin nagtapok ang daghan nga mga sakyanan.
Sa third segment gikan sa Naga paingon sa Talisay City nga adunay 17.15 kilometros ang distansiya, anaa pa sa singko kilometros ang nahuman sanglit matag tuig i-release ang pundo nga didto gikuha sa General Appropriations Act.
Niadtong Mayo 2022, si kanhi regional director Edgar Tabacon sa DPWH-7 nagkanayon nga gikan niadtong 2017 hangtod 2022, P1.3 bilyunes pa ang na-release kun P260 milyunes matag tuig alang sa proyekto.
Matod niya nga kon magpadayon ang maong paagi, molanat og 17 ka tuig aron makompleto ang Segment 3 nga mokantidad og P4.5 bilyunes.
Iyang gisugyot nga ibutang ang MCE ubos sa foreign assistance (Overseas Development Assistance) o PPP (public-private partnership).
Wala pa masugdi ang pagtrabaho sa Segment 1 ug 2 nga adunay 57 kilometros nga distansiya gikan sa Danao City hangtod sa Talisay City tungod sa kakuwang sa pundo.
Ang DPWH ubos sa administrasyon ni Presidente Ferdinand Marcos Jr. nitawag sa Metro Cebu Expressway project isip usa sa mga prayoridad niini aron mapalambo pa ang ekonomiya sa Sugbo.