Nakurat ang magtiayong tag-iya og security agency sa dakbayan sa Mandaue dihang sila gidakop base sa warrant of arrest tungod sa reklamo nga kapakyas sa pag-remit sa kontribusyon sa Social Security System (SSS) sa ilang mga guwardiya.
Si Jonnifer Sarsalejo, 45, minyo, nagpuyo sa Canduman Housing sa Barangay Canduman, Mandaue City, gidakop alas 11:35 sa buntag sa Miyerkules, Marso 15. Lakip sa gidakop ang iyang asawa nga si Arne Sarsalejo, 48.
Si Jonnifer nga nahinabi sa Superbalita Cebu, niingon nga nakurat siya dihang nalutsan og warrant of arrest nga giisyu ni Judge Chonita Lara Maagad sa Regional Trial Court (RTC-7) Branch 56 sa Mandaue City nga gipetsahan Marso 14, 2023.
Gipadayag niya nga duna silay igong mga dokumento, sama sa mga resibo, nga makapamatuod nga sila nibayad sa contribution sa SSS alang sa ilang mga gwardiya. Matod niya, ang mga dokumento gihuptan sa iyang asawa ug sa ilang abogado.
Si Jonnifer nipadayag nga andam moatubang sa korte sa maong kaso. Hinuon, ang magtiayon gibuhian dayon human nakapiyansa sa alas 12:00 sa udto sa samang adlaw.
Si Police Major Manuel Cabanlit, hepe sa Police Station 6 sa Mandaue City Police Station nga nahinabi sa Superbalita Cebu, niingon nga igo lang silang nipatuman sa warrant of arrest. (GPL)