Ang litsong baboy pwede mabaligya o madala sa gawas sa dakbayan sa Carcar.
Usa kini sa pamahayag ni Cebu Governor Gwendolyn Garcia kagahapon, Marso 15, 2023, bahin sa kabalaka sa pagkaon sa litson o mga produkto sa baboy gikan sa naasoy nga dakbayan.
“Its a national policy they are allowing sausages, chicharon, mga processed ba. Pero cooked man pod gud ni, and in fact, it is allowed by the region ang mogawas nga luto kay lami lagi,” matod sa gobernador.
“May I repeat this to all Cebuanos, you can eat it, labi na og lami, kon wa’y lami ayaw’g kan-a,” dugang ni Garcia.
Apan gisubli ni Garcia nga ‘non-negotiable’ ang kamandoan niya labot sa pagdili sa pagpakaon og lamaw sa mga baboy.
Ang masakpan nga mopakaon og lamaw mapahamtangan og tukmang silot nga gikatakda pang hisgutan.
Samtang, moumol og grupo nga motutok sa hugot nga monitoring sa backyard farms subay sa pagpatuman sa mas hugot nga biosecurity bisan pa sa mga barangay ug purok.
Matod ni Garcia, gikinahanglan niya ang abag sa barangay sanglit mas maayong masusi pag-usab ug ma-monitor ang datos sa mga baboy pagsiguro kon tinuod ba nga African swine fever (ASF) ang nitapot nga sakit sa baboy, classical swine fever (CSF) o hog cholera.
“I am now questioning whether our data is accurate or the data of the region is accurate that the three barangays are kay unang nigawas 11 gani nya after three na lang...,” matod ni Garcia.
“We have to consider all possibilities and I believe this could be cholera (that) cause mortality..,” dugang niya.
Aron maagni ang mga sakop sa barangay, nagplano si Garcia nga hatagan usab kini og incentive ilabi na kon magkugi sa pag-monitor ug paghatag og daily reports.
“I am going to formulate a team but this will be down to barangay level and even purok so that any manifestation or any symptom that is manifested in a hog this must be immediately reported...” pasabot sa gobernador.
Gihunong na ang pagpamatay sa baboy, apan giklaro ni Garcia nga magpabilin ang hugot nga border control.