Ang Metro Cebu Expressway maoy karsada nga molagbas sa kabukiran gikan sa dakbayan sa Naga sa south ngadto sa Danao City sa norte. Kapin sa 70 kilometro ang gitas-on sa karsada.
Tumong niini mao ang pagpaluag sa trapiko sa N. Bacalso Avenue sa habagatan ug Cebu North Road sa amihanan.
Kon grabe ang kahimtang sa trapiko karon, mas mograbe pa kini sa umaabot nga katuigan taliwa sa paspas nga paglambo sa nasod, labina sa Sugbo.
Mosaka ang populasyon, mao usab ang kadaghanon sa mga sakyanan samtang way bag-ong mga dalan nga gipang-ablihan.
Gastuhan og labing minos P98 bilyunes ang mao nga karsada, kana kon dunay mga tunnel nga himuon, inay nga gamiton ang naandan karon nga paagi sa paghimo og mga dan.
Sukad gisugdan ang pagtrabaho sa mao nga dan, kapin pa lang sa P1 billion ang napagawas sa kagamhanan. Mao nang mismo ang Dept. of Public Works and Highways maoy nisugyot nga pagastuhan kini og mga langyaw o sa pribadong mga kompaniya pinaagi sa public private partnership sama sa Cebu-Cordova Link Expressway (CCLEX) nga way gasto ang kagamhanan, apan dumalahon kini sa pribadong kompaniya sulod sa katuigan aron mabawi ang puhonan.
Bitaw, inay nga isalig sa kagamhanan ang paghuman niini, nga gibana-banang molanat pa og 17 ka mga tuig kon sila ang motrabaho, ihatag kini sa pribado.
Di tiaw ang kadaut nga dala sa kahuot sa trapiko, labina sa mga negusyo. Usa ka langyaw nga pagtuon nibana-banang binilyon ka pesos ang nausik sa ekonomiya sa Sugbo tungod sa trapiko.
Kon imong tan-awon ang mga karsada karon, bisan giunsa pagdumala ang trapiko sa mga local government unit (LGU), wa gihapon kini hapit nahimo. Naalibyuhan lang og gamay apan kasagaran palpak ang mga solusyon.
Di kini tungod kay di maayo ang pagkadumala sa trapiko. Lisod na gyud ang kahimtang sa kadalanan tungod sa nagsige og panaghang mga sakyanan.
Mao sab kini ang problema sa ubang dagkong mga nasod, kansang urban centers, duna pay dako ug lapad nga mga karsada.
Samtang wala pay klaro ang modernong mga mass transportation system, ang paghimo og laing mga karsada, labina lapad, gikinahanglan kaayo.
Dako kaayo ang kahigayunan nga ang naghuot nga mga sakyanan sa N. Bacalso Avenue ug Cebu North Road makuhaan pinaagi sa Metro Cebu Expressway.