Rabacal: Nalangay nga hustisya

Rabacal: Nalangay nga hustisya

Daghan na kaayong nangayo og hustisya sa kamatayon sa ilang minahal sa kinabuhi. Adunay nahatagan niini apan milungtad usa og dugay nga katuigan samtang ang uban nagpaabot pa kon kanus-a mahatagi niini. Nag-agad kini kon unsa ang kahimtang sa ilang kaatbang sa kaso.

Adunay mga krimen nga ang mga tawo nga gipasanginlan wala pa gayud mopakita aron pagtubag sa mga kaso nga gipasaka batok kanila. Bisan kon hangtud karon ang uban wa pa mapamatud-i nga sila sad-an apan ang ilang pagdumili nga moatubang aron pagtubag sa pasangil batok kanila maoy maghatag og pagduda nga sila sad-an.

Nahingangha ang katawhan sa dihang nasayran nga daghan na diay kaaayong gipamatay didto sa Negros Oriental nga wala pa masulbad. Napun-an na lang kini og laing gipamatay usa pa napasaka ang kaso nga nahitabo niadtong 2019.

Hinaut pang dili madugay ang pagsulbad niining pagpatay kang Gob. Roel Degamo ug sa walo ka mga tawo nga nangayo lang unta og hinabang didto sa panimay mismo sa gobernador. Bisan kon grabe ang paagi sa pagpamatay apan nakahatag hinuon kinig kaisog sa katawhan sa maong dapit. Atong nakita nga andam silang mobarug aron mahibalik ang kahusay ug kalinaw sa ilang dapit.

Apan nganong ang hustisya lahi man sa mga dato ug sa mga pobre? Nganong sa ubang mga nasud dili man ingon niini ang sitwasyon? Ako nagtuo nga nagkuwang ang atong mga tinugyanan sa gobiyerno sa pagpatuman sa hustisya alang sa tanan. Sama karon nga ang gihatagan og pagpinig mao kadtong adunahan ug gamhanan.

Hinaut pang ang administrasyon ni Presidente Bongbong Marcos maninuod sa pagpatuman sa balaud alang sa kaayuhan sa tanan sama sa pagtaral gayud sa hukmanan sa mga makasasala ug pagbungkag sa tanang klase sa sindikato aron luwas ang paglihuk-lihok sa atong katawhan.

Lain na usab nga barangay kapitan ang gipusil-patay sa lungsod sa Asturias niadtong Martes. Usa ka gidudahang motibo mao ang politika. Hinaut dili unta tinuod nga politika maoy hinungdan aron dili na mapun-an ang mga biktima sa mga politiko nga dili maantigong moaway pinaagi sa balota. Makapanglimbawot sa balhibo kon simbako mauso na usab kini dinhi sa Sugbo. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph