Suportado sa dagkong mga opisyal sa Sugbo ang gitinguhang pag-usab sa economic provisions ilawom sa 1987 Philippine Constitution atol sa katapusang public hearing sa Committee on Constitutional Amendment and Revision of Code sa Seda Hotel, Marso 16, 2023.
Kini ang gipahibawo ni Senador Robinhood Padilla, chairman sa maong komitiba, nga ni-courtesy call kang Cebu Gwendolyn Garcia ug Mayor Michael Rama sa wala pa ang public hearing nga gitambungan sa gatusan ka mga tawo gikan sa lainlaing sector.
“Opo, sumusoporta po ang ating mahal na gobernador at mayor,” matod ni Padilla.
Gihimong sanglitanan ni Padilla nga ang Cebu nga maoy kanunay nga mag-una, diin iyang gibutyag nga dihang nibuto ang rebolusyon batok sa mga Español, ang Cebu o Visayas maoy unang naghimo og Federal Republic.
Si Rama kinsa usa sa mga namulong atol sa public consultation niingon nga angay na nga adunay ipahigayon nga kausaban labi na sa economic provisions.
Si Kapitan Victor Buendia sa Barangay Labangon kinsa usa sa gatusan ka mga tawo nga nitambong nagkanayon nga pabor siya sa amendment kon walay mga insertion nga isukip ang mga magbabalaod nga moresulta sa pagkadehado sa katawhang Pilipino.
Si Padilla, gikauban si Senador Ronald “Bato” Dela Rosa, nipasalig sa publiko nga dili maabuso ang maong amendment ug sila mobarog alang sa kaayuhan sa katawhan. (PAC)