Mga duwa karon:
3:00 pm- San Miguel
batok Rain or Shine
5:45 pm- Talk N’ Text
batok Ginebra
Suwayan paglangkat sa Talk N’ Text (TNT) Tropang Giga ug Brgy. Ginebra Gin Kings ang No. 1 nga puwesto sa ilang panagparang sa main game karong alas 5:45 sa hapon, Marso 17, 2023, sa Philippine Basketball Association (PBA) Governor’s Cup sa Philsports Arena sa Pasig City.
Ang Tropang Giga kasamtangang nag-una sa standing dala ang 9-1 nga rekord samtang sikit nga nagsunod sa ikaduha ang Gin Kings dala ang 8-2 nga rekord diin kauban nila ang San Miguel Beermen.
Kon modaog ang Tropang Giga, hayan deretso nilang maangkon ang No. 1 nga luna.
Apan kon ang Gin Kings maoy modaog, hayan puwedeng mahitabo ang triple-tie sa ibabaw nga bahin. Kini kon modaog sab ang Beermen sa premirong duwa batok sa Rain or Shine Elasto Painters.
Kon mao kini ang mahitabo, gamiton ang qoutient tie-break system aron pagdeterminar sa posisyon sa mga nangahilambigit. Ning sitwasyuna, dako ang purohan sa Beermen nga makakawat sa No. 1 nga puwesto.
Ang Tropang Giga, Gin Kings, Beermen ug hasta ang Meralco Bolts (7-4) pulos na nakaseguro og luna sa top 4 nga maghatag kanila og twice-to-beat nga benepisyo batok sa tagsatagsa nila ka kontra sa quarter-finals.
“We’re going to use the game as a tool to get ready for the playoffs which start Sunday for us,” matod ni Ginebra coach Tim Cone.
“We’ll play our starters to stay sharp but try not to use them too much so they can be fresh for Sunday. Right now, all we have is ‘playoffs’ on our minds.”
Sa ilang bahin, ang Elasto Painters naggunit og 2-8 nga rekord ug usa sa upat ka teams nga manamilit og sayo sa season-ending conference kauban ang NorthPort Batang Pier (3-8), Terrafirma Dyip (2-9) ug Blackwater Bossing (1-10). (ESL)