Suan: Dagat dili pa paligoan

Giklaro ni Cordova Mayor Cesar “Didoy” Suan nga wala pa niya gilibkas ang ban sa pagkaligo sa kadagatan sa Barangay Poblacion ug Catarman sa maong lungsod bisan mikunhod na ang fecal coliform level sa dagat.

“Ako sang ihangyo ang tanan while wala pa nato mahuman, wala pa ma-complete og study nga okay na ba gyud ang area, dili sa nato pahimuslan pag-ayo ang atong kadagatan,” matod ni Suan sa Marso 15.

Una nang niluwat og kamandoan ang mayor ug si Cebu Governor Gwendolyn Garcia nga dili pakaligoan ang naasoy nga dagat sa lungsod base sa rekomendasyon sa Department of Health (DOH-7) tungod sa taas nga level sa fecal coliform nga dala sa floating cottages kaniadto nga gipademolis na.

“Wala pay confirmation gikan sa Province nga pwede na paligoan ang area..,” dugang sa mayor bisan ubos na ang level sa kagaw gikan sa hugaw sa tawo.

Giangkon ni Suan nga daghang pumpboat operators nga ninghangyo kaniya nga pakaligoan na ang dapit apan wala una motugot ang mayor.

Nagpabilin ang pangutana sa katawhan nga hangtod kanus-a ang pag-ban.