Usa ka katabang nga minyo, boluntaryong ningtahan uban sa iyang katipon nga ulitawo nga kusinero, sa kapulisan sa lungsod sa Sibonga, alas 3:00 sa hapon sa Huwebes, Marso 16, 2023, human sila nasayod nga nalutsan og warrant of arrest sa kasong adultery nga gipasaka sa bana.
Si Emma (dili tinuod nga ngalan), 33, nagtrabaho isip katabang, nagpuyo sa Purok Agila, Barangay Sayao, Sibonga, apan lumad nga taga Brgy. Bonbonon, Pres. Carlos Garcia, Bohol nitahan uban kang Mario, 33, taga Purok Agila, Barangay Sayao.
Si Major Rodgene Fudotan, hepe sa Sibonga Police Station nga nahinabi sa Superbalita Cebu, nagkanayon nga ang bana nga si Gilbert (dili tinuod nga ngalan), 42, fishpond caretaker, taga Brgy. Bonbonon, maoy nipasaka sa kasong adultery batok sa iyang asawa ug giingong kabit.
Ang Superbalita Cebu nitago sa matuod nga mga ngan sa mga hingtungdan aron pagpanalipod sa mga anak ug pamilya.
Sumala ni Fudotan, ang bana nangayo og abag sa ilang buhatan human nasakpan niya ang iyang asawa nga wala na nipauli sa Bohol kay nakigtipon sa kusinero.
Tungod niini, ang Women and Children Protection Desk (WCPD) sa Sibonga police, niabag sa bana sa pagpasaka og kasong adultery niadtong Oktubre 17, 2022.
Gibutyag ni Fudotan nga si Judge Haide P. Acuña sa Municipal Trial Court (MTC) sa Sibonga, Cebu, maoy niisyu sa warrant of arrest sa kasong adultery nga gipetsahan og Marso 8, 2023.
Si Acuña nihatag og pagtugot sa duha ka mga akusado nga makabutang og tag P10,000 nga piyansa alang sa ilang temporaryong kagawasan.
SELOSO?
Si Fudotan niingon nga si Emma nibutyag nga gipul-an na siya sa iyang bana tungod sa pagka seloso samtang didto pa siya sa Bohol. Kanunay silang mag-away hangtod nga siya nakahukom nga mosulod isip katabang sa dakbayan sa Carcar.
Gibilin niya ang iyang upat ka mga anak sa iyang bana.
Apan sa gihapon kanunay silang magkaaway sa panahon nga manawag sa selpon, asoy ni Emma. Gawas pa niini, ang iyang bana dili sab gusto nga iyang mahinabi ang ilang mga anak.
“Kanang grabi kaayo ka seloso iyang bana, sige silag away kay magduda. Hangtod nga nagkabuwag, nitipon sa kusinero,” dugang ni Fudotan.
Sila si Emma ug Mario, kinsa nagtrabaho sa usa ka restaurant sa Carcar, nagsige og kita hangtod nga nagpuyo ug nakaanak og usa nga nagpangedaron og usa ka tuig pa sa pagkakaron.
Dugang ni Fudotan, ang bana daan nang nagduda sa iyang asawa ug sa iyang pagsusi sa trabahoan sa Carcar, wala na kini didto.
Hangtod nga dunay nakasulti kaniya nga naa sa Sibonga ug iyang nasakpan nga nitipon kang Mario. (GPL)