Gidapit ni Cebu Governor Gwendolyn Garcia si Senador Robin Padilla sa umaabot nga Suroy-Suroy sa Sugbo sa isla sa Camotes sa Abril 2023.
Atol sa pagbisita sa senador sa Kapitolyo, pormal nga giimbitar ni Garcia si Padilla sa Suroy-Suroy Sugbo “Enchanting Camotes” sa Abril 15 ug 16.
Sa gipahibalo sa Cebu Provincial Information Office, nisanong ug mihatag og commitment si Padilla sa pagsuporta ug pagkuyog sa nabantog nga tourism program.
Subay sa impormasyon sa Cebu Provincial Tourism Office, abli na ang registration alang sa mga gustong mosalmot sa naasoy nga kalihukan.
Ang package niini magsugod sa P9,000 ngadto na sa P11,000 magdepende sa mapili nga accommodation o katulgan sa mga bisita sa maong higayon.
Nalakip na sa maong package ang Premium Air-conditioned Bus, Full Board Meals sulod sa duha ka adlaw, boat transfers, Suroy Suroy kit nga dunay sulod nga mga payong, t-shirts, bag, brochure ug visor.
Matag bus, aduna kini’y sakay nga tour guides nga accredited sa Department of Tourism (DOT).
Alang sa mga gusto nga mag-book, mahimo kining modangop sa opisina sa Tourism Office sa Kapitolyo alang usab sa dugang detalye.