Dear Noy Kulas.
Maayong adlaw. Taudtaud na unta kong nagpatambag nimo pero karon lang ko nilugar kay misamot na ko og kalibog.
Ako diay si Helen but di nako ni real name. Single ko but duna na koy live in partner ug duna mi anak. Wa man koy problema sa akong partner kay di siya palikero pero tapulan.
Ako ang grabeng kayod kay siya kuntento ra sa iyang pagka construction worker nga maayo lang og naa o wala. Unta, high school graduate siya. Ako college level man ko pero wa katiwas tungod sa kalisod.
Karon, naa koy naila-ila sa online nga foreigner nga serious. Di kaayo mi lagyo og edad ug niari siya sa Cebu adtong December aron makigkita nako. Nag meet nga wa kahibawo ang akong pares. Serious ug buotan siya. Nakahibawo siya sa akong situation ug andam siya nga mokuha nako ug sa akong anak. Mao ni ang akong nalibgan karon kay mobalik kuno siya dinhi aron magminyo mi ug dad-on mi niya igkahuman.
Noy, sakto kaha nga ako siyang dawaton? Bisan tuod tapulan ning akong pares pero buotan. Kana lang iyang pagkakontento na lang nga makakaon mi og katulo sa usa ka adlaw. Maayo unta imo kong matambagan. Daghang salamat.
HELEN
Len,
Ka luoy sab sa imong live in partner nga imo lang biyaan tungod kay giingon nimong tapulan. Unsa man say imong ma expect sa high school graduate?
Mas maayo gani nga imo siyang i-encourage nga di lang mohunong diha, labina sa construction work. Naa may daghang courses ang Tesda nga iyang maeskwelahan alang sa mga high school graduate.
Unya ayaw pud i-lookdown ang construction work kay kon kahibawo lang na mo-position ang imong kapuyo pinaagi sa imong encouragement, mahimo nang maka-abroad kay duna na man siyay experience.
Ayaw lang una paghunahuna sa pagbiya niya kay di ra ba tanang kinabuhi sa abroad ug pagminyo og foreigner nindot. Daghan sang bati. Pagpabilin sa imong kapuyo and dasiga siya sa pagkugi alang alang sa inyong anak. Apan kon di gihapon, diha ka na mohukom biyaan ba siya o di.
NOY KULAS
rojval69@yahoo.com