Dunay haw-ang nga bahin sa pagpatuman sa Local Government Code of 1991, naghatag og awtonomiya o igong gahom sa lokal nga kagamhanan, tungod sa pagtumaw sa pipila ka mga isyu tali sa mga sanga sa nasudnong mga ahensiya sa lokalidad ug liderato sa lokal nga kagamhanan.
Sama kang Cebu Governor Gwendolyn Garcia, lokal nga lider nga way pagpanuko ug way kahadlok nga mosungag sa mga opisyal sa nasudnong ahensiya labi na sa mga emerhensiya nga mugna sa natural nga kalamidad ug bahin sa panglawas.
Ning ulahi, iyang gipahungawan sa kasagmuyo ang Department of Agriculture (DA 7 bahin sa pagsanta sa kaso sa African swine fever (ASF) nga natala sa mga baboy gikan sa tulo ka mga barangay sa dakbayan sa Carcar. Usa ka opisyal sa DA niingon nga patyon ang mga baboy sulod sa 50 radius gikan sa nagpositibo aron pagseguro nga dili makakaylap ang virus. Sa maong pamaagi, bisan kadtong mga baboy nga himsog mapagan sa pagpamatay.
Apan supak si Garcia niini. Iyang nakita nga daghang kuwestiyon bahin sa test sa DA labi na sa pagkompirmar kon matuod ba kining kaso sa ASF o ubang sakit sama sa classical swine fever (CSF) nga giingong dunay susamang simptomas.
Sa polisiya sa DA, dili tiaw lang linibo nga alkanse namuhi og baboy tungod sa kamahal sa lawog. Mapasalamaton sila kang Garcia. Samtang, si Dr. Daniel Ventura, ASF coordinator, nikutlo sa lagda sa DA bahin sa biosecurity measure alang sa mga baboy apan si Garcia balaod bahin sa iyang gahom sa paghukom ug paghimo og lakang panahon sa emerhensiya sulod sa iyang hurisdiksiyon.
Dili kini unang higayon sa pangsumpaki ni Garcia tali sa nasudnong ahensiya sa kagamhanan. Nakadumdom ba kamo sa Inter-Agency Task Force for the Management of Emerging Infectious Diseases (IATF-MEID) sa pandemiya sa coronavirus disease 2019 (Covid-19)?
Hinuon, ang pagsungag ug pagbarog ni Garcia sa lokal nga awtonomiya moresulta sa hinayhinay nga pagkapilot sa haw-ang sa pagpatuman sa Local Government Code of 1991.