MALAMPUSONG na-turnover ang Balai Maganahay Project Phase 1 sa Barangay Dawan ning Dakbayan sa Mati Biyernes, Marso 17, 2023.
Kahinumdoman nga niadtong Mayo 18, 2021, ang lokal nga panggamhanan ubos sa administrasyon ni Mayor Michelle Rabat ug ang National Housing Authority (NHA) nagpahigayon og groundbreaking ceremony alang sa pagpatukod sa 100 ka mga balay nga para sa mga indigenous people (IP) nga adunay budget nga P20 milyones sa Barangay Dawan.
Karong bag-o, na-turnover ang 100 units nga mga balay o ang Balai Maganahay Project Phase 1 ngadto sa mga tag-iya niini diin midawat ang mga beneficiaries og Certification of Housing Unit gikan sa NHA ug lot award gikan sa LGU-Mati.
Samtang under construction pa ang Balai Maganahay Project Phase 2 nga adunay 75 ka mga housing units ug budget nga laing P20 milyones.
Apan bag-o pa man gisugdan ang konstruksyon, nagtagana ang LGU og P16.85 milyones alang sa land development sama sa embankment, aggregate-subbase course, cur and gutter ug construction of CHB Line Canal ug Provision of RCPC Cross Drains alang sa duha ka proyekto.
“Ang Dawan ang next development sa Dakbayan sa Mati kay ang expansion padulong diri. Congratulations sa tanang mga beneficiaries! Ampingan niyo, alagaan natin ang bigay ng gobyerno. Pagkakataon na ni na napili mo maging beneficiaries,” sulti ni Mayor Michelle Rabat atol sa turnover.
Dakong pasalamat ang giambit usab sa mga recipients sa maong proyekto ngadto sa Mati LGU ug sa NHA tungod nahatagan sila og oportunidad nga makapanag-iya og ilahang luna ug panimalay. (CIO-Mati/Cerlyn Cabanit)