Ginang wala katiwas sa pag-inom sa tubig human pusila, alas 5:00 sa kaadlawon, Huwebes sa Sitio Ponce 2, Barangay Carreta, dakbayan sa Sugbo.
Si Lorna Bicada, 47, minyo, ug molupyo sa naasoy nga dapit, nakaangkon og pinusilan sa iyang tuong abaga.
Si Police Executive Master Sergeant Winston Ybañez, imbestigador sa Waterfront Police Station nga nahinabi sa dySS Super Radyo Cebu, niingon nga ang biktima nigawas sa ilang panimalay pagkakaadlawon human giuhaw ug nipalit og tubig sa ‘piso-piso machine.’
Wala pa siya nakainom sa tubig, usa ka wala mailhing lalaki ang niduol kaniya ug nangutana kon siya ba si Lorna Bicada, nitando usab ang biktima.
Dihadiha gipusil sa nag-inusarang mamumuno gamit ang wala pa matinong kalibre armas.
Ang biktima gidala sa pribadong tambalanan sa dakbayan sa Sugbo.
“Nagtuo ang biktima nga naalaan siyang asset sa police, Dunay mga nadakpan sa lugar sa illegal nga drugas,” dugang ni Ybañez.
Si Bicada nipadayag nga duna silay mga higala nga pulis hinungdan nga dili layo ang posibilidad nga natahapan siyang asset.
Gisubay na karon sa kapulisan ang pag-ila sa suspek. / GPL