Sakit-sakit sab gyud tong kapildihan sa Los Angeles Lakers kagahapon batok sa Dallas Mavericks, 110-111, sa nagpadayon nga National Basketball Association (NBA).
Naa na gyud unta sa ilang kamot ang kadaugan apan sa kalit lang nitidlom kini palayo kanila sa dihang mipabuhagay og tres si Maxi Kleber human makadawat og pasa gikan ni Kyrie Irving tukma sa pagkapupos sa oras.
Sayo niini, samtang naglabaw og kuwatro puntos ang Lakers, si Kleber mikompleto sa iyang tulo ka foul throw shots, 7.2 segundos ang nahabilin sa duwa, human sa unnecessary foul ni Anthony Davis sa three-point area.
Sa tanang 10 puntos ni Kleber diha niya mapuga sa fourth quarter ug ang unom niini iyang nahimo sulod lang sa 7.2 segundos.
Unya sa inbound pass, nakakuha usab og foul si Davis apan sa duha ka free throws usa ra ang napasulod niini, ug sa wa damha, kadto diay maoy naghatag og timaan sa ilang kapildihan.
Kini maoy naghagsa kanila ngadto sa ikanapulo nga puwesto gikan sa ikasiyam nga luna sa sikit kaayo nga standings sa Western Conference, dala ang 34-37 nga baraha.
Ang Dallas uban sa Golden State Warriors mao karon ang nag-okupar sa ikaunom ug ikapito nga lingkuranan nga pulos may 36-35 nga record.
Wa si LeBron James sa Lakers ug wa usab si Luka Doncic sa Mavericks sa duwa tungod sa ilang tagsa-tagsa ka injuries.
Ang Lakers nga gipakaging usab sa Houston Rockets sa miaging adlaw, mosakbang sa Orlando Magic sa Lunes samtang ang Mavericks mosuway usab sa katakos sa Memphies Grizzlies sa Martes.
Ning pila na lang ka mga duwa ang nahabilin sa regular season, krusyal ang sitwasyon sa mga inilang team nga mao ang Golden State, Dallas, Lakers ug Utah Jazz kay dili usab halayo sa ilang baraha ang Minnesota Timberwolves, Oklahoma Thunder City, ug bisan ang Utah Jazz.
Mao ni nakanindot sa NBA kay bisan sa ilang format ug standing dunay thrilling.
Oppsss....
Laraw karon ni Michael Jordan ang pagbaligya sa iyang team Charlotte Hornets ngadto sa laing negusyanting grupo nga usa ra usab sa minority share holders sa team.
Matod pa sa taho ni Adrian Wojnarowski sa ESPN nga aduna nay panagtagbo si Jordan ug sila si Gabe Plotkins ug si Rick Schnall, minority owner usab sa Atlanta Hawks.
Hinuon, dili gihapon mawagtang ang pagpanag-iya Jordan sa team sanglit magpabilin man siya isip minority owner sa team nga iyang naangkon niadtong tuig 2010 human niya mapalit ang majority share sa kantidad nga 275 million dollar gikan sa team owner nga si Bob Johnson.
Sa wa pa siya mamahimong majority share owner, si Jordan usa usab sa minority share holder sa maong franchise sukad sa 2006.
Morag nawad-an og gana si Jordan sa team tungod kay sukad siya ang nanag-iya sa team, kaluoy sa Diyos, consistent man ning di makasulod sa playoffs.
Tiaw mo bay sa 13 ka tuig niyang pagdumala, ang Charlotte kaduha ra makataak sa postseason, katapusan niadtong 2006.
Ubos usab sa iyang pagdumala, kalima na ka higayon nga nag-ilis-ilis siya og head coaches, unya gawas niini pipila na usab ka star players ang nabalhin ngadto sa laing team - sama ni Kemba Walker - ug kadaghan na usab ka higayon nga daw ug sa dimalas sila sa drafting.
Hinuon ning uwahi lang, morag nakasubay na og maayong dalan ang team sa dihang ilang nakuha si LaMelo Ball kinsa maoy nahimong rookie of the year awardee sa 2020 ug nalakip sa All-Star season.