Gipangkawras sa Team Lite Cat ang Aisle Marine Services (AMS), 120-103, sa ilang knockout championship game aron labnihon ang titulo sa Lite Shipping Basketball Tournament ning bag-uhay lang sa Alta Vista Golf and Country Club sa Barangay Poblacion Pardo, Dakbayan sa Sugbo.
Pagsugod sa duwa, ningratsada dayon ang opensa sa Lite Cat aron pagposte og 30-18 nga labaw.
Nagpadayon ang kabangis sa Lite Cat hangtod nga nainat nila ang ilang labaw, 57-36, sa halftime ug human niini, wala na sila molingi pagbalik.
Gipangulohan ni Jack Echavarria ang kadaugan pinaagi sa iyang 23 puntos samtang ang napiling Finals MVP nga si Don Gudez niamot og 20 puntos.
Ang gipakitang duwa nila ni Echavarria ug Gudez igo na aron tapakan ang bugnaw nga duwa sa ilang pambato nga si season MVP Rex Bangalao, kinsa igo lang nitali og upat ka mga puntos.
Ang tag-iya sa Lite Cat nga si Jethro Lim Imboy mapasalamaton nga naangkon nila ang kampyunato.
“To the staff behind the success of our team, to our coach, Ed Macasling, the players, and especially to our co -sponsors, WTG Construction and Leoncio Builders. None of this will happen without the help and sacrifice of these people,” batbat ni Jimboy, kinsa giabagan nila ni Admar Leoncio ug Wilmer Go sa pagduma sa ilang puwersa.
Ang torneyo tipik sa mga kalihukan sa Lite Cat Shipping isip pagpaila sa bag-o nilang barko nga mao ang Lite Cat 2, nga maabot sa Sugbo karong Abril, 2023. (ESL)