Daghan ko og nakit-ang mga batan-on nga manaka sa Brgy. Busay magabii nga kadaghanan way blinkers ang ilang mga biseklita ug nakatapot sa ilang helmet. Wa sila nasayod sa ka importante niini nga gadget.
Makapadagan sa biseklita kiat kaayo, mag-ikis-ikis nga way pagkonsiderar nga dunay laing mga sakyanan nga nagsubay sa dan. Maora ba og nakiglumba sa ubang mga sakyanan, labina sa pagdulhog.
Kaniadto sa amoang mga ride sa Cebu Folding Bike Society, amoang pamadlungon ang kadtong mang-exhibition sa karsada kay kuyaw nga makaigo og pedestrians sa daplin. Mao nang dunay wa nakauyon, ningtukod og laing grupo.
Amoa usab nga gihimong polisiya ang no blinker, no helmet, no ride. Gihimo kini namo nga polisiya agi og pag-edukar sa publiko sa kamahinungdanon sa helmet isip proteksiyon sa importante kaayo bahin sa lawas sa tawo nga mao ang ulo. Kinahanglan kini nga protektahan.
Must sab namo ang blinker kay importante kini panahon sa gabii aron mabantayan ang siklista nga naa sa karsada. Mas daghang blinkers, mas maayo.
PAGTUON
Daghang mga pagtuon nga nagpakita nga ang nagkidlapkidlap nga suga sa gabii mopaalerto sa utok. Lahi na ra ba ang kondisyon sa utok sa gabii kay sa adlaw. Tungod sa atoang routine o naandan nga matulog sa gabii, ang kondisyon sa atoang utok hinay na sab.
Di na kaayo kita alerto panahon sa kagabhion. Lahi sa adlawan, labina sa buntag.
Gawas nga magbutang og blinker sa seat post sa biseklita, importante usab nga naa sa likod sa helmet.
Gawas sa blinkers, ang pagsul-ob og mga sapot nga makita sa gabii importante usab kaayo. Nakaingon ko nga mas maayo nga hayag ang isul-ob tungod kay kadaghan na ko naigking sa dan samtang nagdapagan sa motorsiklo kay wa dayon ko nakakita sa nag-bike.
Lahi ra kon hayag ang gisul-ob ug dunay blinkers nga gipangmontar kay makita dayon sa mga sakyanan nga nagsunod o nagdulong.
Ang visibility mahinungdanon kaayo sa gabii kay lahi ra kaayo panahon sa adlawan nga makita ang tanan. Usahay gani bisan adlawan, malipat pa.
Mao na ang atoang itanom kanunay sa huna-huna matag higayon nga mosikad ta sa gabii. Samot na karon nga daghan sa mga nagmotorsiklo matawag nga kamote riders.
MAS KUYAW
Kon kuyaw ang karsada mga lima ka tuig ang nakalabay, mas nagkagrabe na kini karon. Ngano man? Nanaghan ang mga sakyanan labina ang mga motorsiklo, daghan kanila way kalibutan kalabot sa kaluwasan sa dan.
Kaniadtong si Joy Tumulak pa ang pangu sa Cebu City Transportation Office (CCTO) sa wa pa siya mibalhin sa dakbayan sa Talisay sa pagdumala sa trapiko, naa sa 30 ka mga disgrasya nga naglambigit og motorsiklo ang mahitabo.
Nasayod ko ini kay maayo kaayo si Joy, dunay data sa mga aksidente matag buwan ug kon asa sagad mahitabo ang aksidente.
Busa, mas mag-amping ta karong panahuna.