Sukad kaniadto pa sa administrasyon ni anhing Presidente Fidel V. Ramos dunay panawagan sa pag-usab sa Constitution sa nasod. Apan puro napalpak ang mga tinguha.
Gawas gani sa Charter Change sa panahon ni kanhi Presidente Rodrigo Duterte, giduso usab ang pederalismo nga kagamhanan. Apan nahuman na lang ang termino ni Duterte, way kausaban sa Constitution ug wa say pederalismo nga natigayon. Kini bisan kon duna nay grupo nga nangampanya alang niini.
Matod sa mga ekonomista, usa sa mga nakapugong sa paglambo sa nasod mao ang pag-limit sa puhonan nga mabubo sa mga langyaw kay di man sila makapanag-iya og 100 percent sa mga kompaniya ug mga kabtangan.
Samtang nagsige og dasig ang kagamhanan sa mga langyaw nga mamuhonan, mobubo sa ilang capital dinhi sa nasod, ang Constitution nag-limit niini. Nagtuo ang mga ekonomista nga hayan usa ni sa nagpugong sa mga langyaw nga negusyante.
Sama gud sa natad sa telekomunikasyon, duha ngadto sa tulo lang ka mga kompaniya ang nagpasulabi sa daghang katuigan hangtod nga nakahukom ang administrasyong Duterte nga buksan kini sa langyaw nga mga kompaniya kay iyang nakita nga di maayo ang serbisyo.
Apan hangtod karon wa pa may langyaw nga telecommunications company ang misulod, hinuon dunay bag-ong players. Ang kapakyas sa mga tinguha sa pag-usab sa Constitution mao ang paghimo unya niini nga basehanan sa paglugway sa termino ug pagpalapad sa gahom sa namunoan.
Naa pa ni nga kahadlok labina nga bisan dugay na, ingon sa lab-as pa sa mga panumdoman sa mga hamtong ang nangahitabo sa Martial Law.
Hinuon, ning higayuna, maorag niirog na ang tinguha kay duna na may balaudnon nga giaprobahan sa Ubos Balay Balauranan alang ning mao nga katuyoan. Kon aprobahan kini sa Senado, hayag na ang pag-usab sa Constitution. Hinaot pang di kini gamiton sa paglugway sa termino sa mga opisyal, inay, alang sa ekonomikanhong kausaban padung sa kauswagan.
Hayan kon wa pa kining mga babag sa pagbubo sa mga puhonang langyaw, dugay rang mitubo ug milambo og maayo ang ekonomiya sa nasod. Kay gilantaw ang probisyon sa pag-limit sa mga langyaw sa pagpanag-iya og negusyo ug propiyedad sa nasod nga pagpanalipod sa interest sa mga oligarch, pipila kanila kingmakers.
Hinaut pa nga ang kausaban sa Constitution alang sa kaayuhan sa nasod, di lang sa interest sa pipila.