Higpit nga mopatuman ang kagamhanan sa lungsod sa Consolacion sa ordinansa nga nagdili sa mamaligyaay, mga tindahan ug malls sa paggamit og plastic bag, sumala sa gi-post sa social media site sa lungsod sa Marso 18, 2023.
Kini human ang Municipal Envionment and Natural Resources Office (Menro) sa Consolacion nakabantay nga daghan gihapong naggamit og plastic bags sa miaging semana.
Sumala sa Menro, ang maong pagdili dili lang sa mga establisemento sulod sa Consolacion Public Market, lakip sa tanang satellite markets sa mga barangay, retail shops, ug sari-sari stores.
Giawhag ang tanang negosyo ug mga konsumidor sa paggamit o pagdala ug alternatibong materyal sa bag sama sa eco-bag, cloth bag, paper bag, bamboo woven basket, ug buyot.
Ang mga makalapas sa maong ordinansa mag-atubang og multa nga P1,000 o pagkapriso nga dili moubos sa usa ka bulan sa unang paglapas, P2,000 nga multa o pagkabilanggo nga dili moubos sa tulo ka bulan sa ikaduha nga paglapas ug P2,500 nga multa o pagkapriso nga dili moubos sa unom ka bulan.
Mahimo usab nga mosangpot sa pagkansela sa lisensya sa tindahan o mamaligyaay.
Ang ordinansa gimugna ug giaprobahan sa konseho sa lungsod niadtong 2018 aron dili na madugangan ang plastic pollution sa lungsod ug tampo usab sa kalibotanong kawsa sa pagkontrolar sa paggamit og plastic.
Ang ubang local government units sa Sugbo hugot usab nagdili sa paggamit og plastic. (MKG)