Ang Department of Justice (DOJ) nipahibalo sa Sabado, Marso 18, 2023, bahin sa pagbasura sa reklamo batok kang Negros Oriental Third District Representative Arnolfo Teves Jr. sa kasong illegal possession of firearms and explosives.
Nisang-at sa reklamo mao ang Philippine National Police-Criminal Investigation and Detection Group (PNP-CIDG), diin usa kini sa walo ka mga kaso nga gipasaka batok kang Teves.
Sa usa ka resolusyon nga gipagawas niadtong Sabado, Marso 18, nga gipirmahan ni Prosecution Attorney Victor Dalanao Jr. uban ang pagtugot ni Senior Deputy State Prosecutor Richard Anthony Fadullon, giingon nga ang reklamo batok kang Teves dili usa ka “proper subject for inquest” tungod kay si Teves wala madakpi atol sa pagpatuman sa search operation.
“Considering that there is [not] enough evidence to proceed to a regular preliminary investigation with regard to him, the complaint against respondent Teves is dismissed,” tipik sa resolusyon.
Sa sayo pa, gironda sa mga awtoridad ang pipila ka mga pinuy-anan nga gipanag-iya ni Teves sa Negros Oriental, nga nagsugod niadtong Marso 10 pinaagi sa search warrant tungod sa illegal nga mga armas.
Ang mga raid konektado sa kasong murder nga gipasaka batok kang Teves ug lima pa ka mga indibidwal niadtong Marso 7 sa CIDG kalabot sa pagpatay sa tulo ka indibidwal sa Negros Oriental niadtong 2019.
Si Teves maoy gitumbok nga utok sa pagpatay kang Gobernador Roel Degamo ug walo ka sibilyan.
Gihimakak na sa kongresista ang kalambigitan sa pagpatay kang Degamo bisan pa man nga giangkon niya nga magkaatbang sila sa politika.
Kasamtangang nag-atubang si Teves sa posibilidad nga masuspenso, mapalagpot o matangtang sa iyang puwesto tungod kay padayong nagdumili sa pagtuman sa direktiba sa liderato sa Kamara nga mobalik sa nasod.
Gihatagan siya og lima ka adlaw aron ipasabot ang iyang padayon nga wala pagtunga sa House of Representatives bisan pa sa iyang expired nga travel authority. / SunStar Philippines
‘NALINGKAWAS’: Si Negros Oriental Third District Representative Arnolfo Teves Jr. nakalingkawas sa kasong illegal possession of firearms and explosives human gibasura sa piskaliya, apan usa lang kini sa walo ka mga kaso nga gipasaka batok kaniya. (SunStar Philippines, gikan sa CIDG)