Usa ka opisyal sa buhatan sa National Irrigation Administration (NIA) Cebu niingon nga andam silang makig-alayon sa kagamhanan sa probinsiya sa Sugbo ug biyaan ang lote nga gipanag-iya sa Kapitolyo sa M. Cuenco Ave. sa Barangay Banilad, dakbayan sa Sugbo.
Si Engineer Nelson Miralles, pangu sa Engineering, Construction and Operations Section sa NIA, nitug-an sa SunStar Cebu nga nagpaabot na lang sila sa pagtugot gikan sa ilang central office sa Manila kon motuman ba sila sa panawagan sa Kapitolyo.
“Kami mga empleyado sa NIA, willing gyud mi mobalhin but ang Manila man gud mo-decide,” matod ni Miralles, Sabado, Marso 18, 2023, ug midugang nga gikuwestyon sa buhatan sa NIA Manila ang bahin sa gisugyot nga relocation agreement sa Cebu Provincial Government.
“Wala mi mag-expect nga in-ana ang gi-propose sa province from deed of donation mobalhin og usufruct,” dugang pa niya.
Gitataw ni Miralles nga kon ugaling mabalhin sila sa bag-ong lokasyon, kinahanglang ideklarar kini ubos sa deed of donation, lahi sa gitanyag kanila sa Kapitolyo, nga usufruct lot lang.
Iyang gitumbok nga ang lote nga nahimutangan karon sa buhatan sa NIA Cebu sa Banilad gihatag kanila ubos sa deed of donation atol sa administrasyon ni kanhi Cebu Governor Osmundo Rama.
Ubos sa gisugyot nga relokasyon sa Kapitolyo, niingon siya nga human sa 25 ka tuig, adunay posibilidad nga mataktak ang NIA didto.
Matod sa taho sa Sugbo News, ang social media arm sa Kapitolyo, ang gilalisan nga lote, nga duol sa Cebu IT Park, himuong economic ventures nga makahatag og regular nga kita sa Probinsiya sa Sugbo.
Ang Kagamhanan sa Probinsiya sa Sugbo niingon sa taho nga dili pa lig-on ang NIA sa pagbalhin sa gisugyot nga relocation site sa Department of Agriculture Compound sa Barangay Guadalupe, sa dakbayan sa Sugbo.
Usa ka bahin sa lote nga giokupar sa NIA Cebu sa Banilad gikoral sa Cebu Provincial Government Biyernes, Marso 17.
Bisan pa nga makabalda kini sa operasyon sa NIA, giklaro ni Miralles nga dili sila makakontra sa na-reclaim nga lote.
Matod niya, ila kining sundon sanglit ang gikoral nga bahin wa maapil sa yuta nga gidonar sa Kapitolyo pinaagi ni kanhi Gobernador Rama.
“Katunga ra gyud ang gi-donate sa amoa. Ang katunga nagdonar, ang katunga gi-request namo sa province sa panahon ni Governor Lito Osmeña panahon sa early 90s,” sigon niya.
Gidugang niini nga nagamit nila ang tapad nga lote isip parkingan sa NIA.
Sa pagkakaron, matod niya, nga ang mga empleyado sa NIA magpadayon gihapon sa pagtrabaho sa Lunes, Marso 20, hangtod makadawat sila og dugang instruksiyon gikan sa ilang central office. (KJF)