Giklaro ni Barili Mayor Pablo John "John-John" Garcia IV sa mga konstituwente niini nga pwede gihapon ang paglapa og baboy sa lungsod, sukwahi kini sa nikatap nga impormasyon.
Gipahibalo ni Garcia nga mahimo kini basta gikan kini sa kaugalingon o sulod lang sa tagsatagsa niini ka mga barangay.
Base sa gipahibalo sa lokal nga kagamhanan sa lungsod sa ilang social media page, nga kon ugaling magpalit og baboy gikan sa laing barangay aron lapaon, kinahanglan kini nga mokuha og permit gikan sa barangay kon diin gikuha ang baboy.
Dugang sa pahibalo, kini aron pagsiguro ug pagpamatuod nga limpyo ug luwas sa African swine fever (ASF).
Ugaling mamatikdan nga nagluya, gimando sa mayor nga ipalahi kini, obserbahan ug i-report dayon sa lokal nga kagamhanan.
Una nang gitigom ni Garcia ang mga pangu sa 42 ka mga barangay sa lungsod diin ilang nasabutan ang pagpatuman sa mas istriktong pagbantay sa mga baboyan sa ilang barangay.
Nalakip sa gipatuman na sa lungsod ang pag-ban una sa pagpamaligya og mga baboy sa Mantalongon Livestock Market sa lungsod.
Gidili na usab ang pagpakaon og lamaw sa mga baboyan kay kon mahibaw-an, tangtangan kini og permit.
Way laing baboy nga makasulod sa lungsod samtang naghuwat pa usab ang kalungsoran sa mga bakuna nga gisaad ni Cebu Governor Gwendolyn Garcia ilabi na sa mga nataptan sa hog cholera nga lain usab nga sakit sa baboy, gawas sa African swine fever (ASF).