Duha ka mga suspek nga wanted sa kasong pagpanglugos sa menor de edad sa managlahing insidente sa dakbayan sa Bogo ang nasikop sa kapulisan sa Sabado, Marso 18, 2023.

TOP 3 SA WANTED

Sa alas 12:20 sa udto, nalista sa top 3 most wanted person provincial level tungod sa duha ka ihap sa kasong statutory rape ug usa ka ihap sa kasong attempted statutory rape, ang nasikop sa Criminal Investigation and Detection Group (CIDG) Cebu City Field Unit sa Purok Nangka, Sitio Bartolome, Barangay Bungtod, dakbayan sa Bogo.

Ang suspek giila nga si Renz Rogel Jugan Lampitao alyas Rogel, 20, ulitawo, taga Purok Kapayas Sitio Curvada Barangay Dayhagon, lungsod sa Medellin.

Ang Regional Trial Court (RTC) Branch 78 sa dakbayan sa Bogo pinaagi ni Judge Samson Troy Kintanar Layese maoy niisyu sa warrant of arrest nga pinetsahan og Marso 15, 2023.

Ang korte mihatag og pagtugot sa suspek nga makapiyansa sa kantidad nga P200,000 sa attempted statutory rape, apan sa duha ka ihap sa kasong statutory rape, wala na motugot og piyansa ang korte.

Matod ni Police Lieutenant Colonel Randy Korret, hepe sa CIDG Cebu City Field Unit, human nila madawat ang warrant of arrest, ila dayon nga gipaubos sa duha ka adlaw nga operasyon sa pagsikop sa suspek ubos sa ilang flagship program sa CIDG ang Oplan Pagtugis.

Nakig-alayon sila sa 701st Regional Mobile Force Battalion (RMFB 7), City Investigation and Detective Management Unit (CIDMU) ug Medellin Police Station.

Usa sa mga informant ang nihatag og kasayuran nga nasigpatan ang suspek sa Bogo sa balay sa kabanay niini hinungdan nga dali nila nga gi-serve ang kamandoan sa korte.

Gitug-an ni Korret nga sa Oktubre ngadto sa Disyembre 2022, nahitabo ang paglugos sa menor de edad nga silingan ni Lampitao.

Nasayran kini human nitug-an ang biktima sa iyang kabanay hinungdan nga napasakaan og kaso ang suspek.

Dugang ni Korret, dihang nasayod nga gipasakaan og kaso, ang suspek nagbalhinbalhin og puyo sa Medellin ug Bogo.

Kasamtangang gikustodiya sa CIDG Regional Field Unit ang suspek ug gitakdang i-turnover sa korte nga maoy nag-isyu sa warrant of arrest.

BARBERO

Usa ka barbero nga wanted sa paglugos sa 15 anyos nga tinun-an napusasan sa kapulisan, alas 12:50 sa kaadlawon sa Sabado, Marso 18, 2023 sa B.M. Dimataga St., Brgy. Poblacion, dakbayan sa Lapu-Lapu.

Si Avelino Cabaluna Caspe, Jr., 34, minyo ug taga Purok Azul, Brgy. Sto. Rosario, dakbayan sa Bogo, napusasan human malutsi og warrant of arrest sa kasong acts of lasciviousness ug upat ka ihap sa statutory rape.

Si Police Senior Master Sgt. Joel Pino sa Bogo City Police Station nga nahinabi sa Superbalita Cebu, nagkanayon nga human pasakai og kaso si Caspe niadtong Oktubre 2022, nibalhin kini sa pagpuyo sa Lapu-Lapu uban sa pamilya.

Apan dunay nakahatag og impormaayon sa Bogo City Police Station hinungdan nga gisubay sa intelligence operatives ug natultolan ang panimalay sa Lapu-Lapu hinungdan nga nasikop.

Matod ni Pino, gisikop si Case pinasikad sa warrant of arrest nga giisyu ni Judge Cesar Mecaydor Madeja sa Bogo City RTC 7 Branch 80, gipetsahan og Oktubre 24, 2022.

Gihatagag katungod sa korte nga makabutang og piyansa nga P36,000 sa kasong acts of lasciviousness apan walay piyansa ang iyang kasong four counts sa statutory rape.

Apan si Case nga nahinabi sa SunStar Superbalita Cebu, nagkanayon nga wala niya hilabti ang biktima.

Gipadayag niini nga iyang uyab ang 15 anyos apan kay supak ang pamilya, gipasakaan siya og kaso.

“Amo nang silingan unya nagkauyab mi pinaagi sa chat-chat sa FB. Moabot sa unom ka bulan ang among relasyon,” dugang ni Caspe.

Matod ni Caspe, motubag siya sa naasoy nga kaso sa korte. (GPL)