Moalboal magtukod og bag-ong merkado

Google map
Google map

Ang lungsod sa Moalboal sa habagatang-kasadpan sa lalawigan sa Sugbo, nagplano nga magtukod og bag-ong merkdao nga mokantidad og dili mominos P400 milyunes.

Tungod sa maong plano, ang lokal nga kagamhanan nakig-estorya sa Land Bank of the Philippines (LBP) alang sa loan agreement alang sa maong proyekto.

Nagtuo si Mayor Inocentes Cabaron nga ang bag-ong merkado publiko makapausbaw sa ekonomiya sa lungsod nga kanunay bisitahon og mga turista tungod sa ilang manindot nga beach ug ubang destinasyon ug makamugna og dugang trabaho alang sa mga lokal nga residente.

Ang gisugyot nga bag-ong merkado publiko adunay 91 ka stalls ug kapin sa 2,500 square meters nga leasable space, adunay upat ka marquee (tent) 100-square meter stalls ug 500-square meter tabo area.

Gilauman nga makapauswag kini sa ekonomiya sa Moalboal ug makamugna og mga oportunidad sa trabaho alang sa mga local.

Sa bag-o lang nga tigom uban sa department heads, barangay officials, sakop sa municipal council, ug ubang local stakeholders, ang mga representante sa Land Bank nibutyag nga ang Moalboal adunay credit ceiling nga P600 milyunes.

Ang credit ceiling ipagawas sa Department of Finance (DOF) Bureau of Local Government Finance, isip kabahin sa inisyatiba ni DOF Secretary Benjamin Diokno sa pagdasig sa local government units (LGUs) nga mangutang alang sa capital investment.

Niadtong Nobiyembre 2022, si Diokno mipadayag sa iyang kasagmuyo nga 62 porsiyento lang sa mga LGUs ang naka-loan sukad niadtong 2017.

Niadtong 2020, gidasig ni kanhi DOF secretary Sonny Dominguez ang local chief executives sa paggamit sa P300 bilyon nga credit facility sa Land Bank aron matabangan ang nasod nga makabangon sa ekonomiya gikan sa Covid-induced financial crisis. (KAL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph