Human sa duha ka tuig nga pagpahulay tungod sa coronavirus pandemic, ipahigayon na usab sa Bohol ang Saulog Tagbilaran Festival.
Atol sa paglusad niini niadtong Huwebes, Marso 16, 2023, si Tagbilaran City Mayor Jean Yap niingon nga ang duha ka buwan nga selebrasyon motapos sa Mayo 1, atol sa kapistahan sa patron sa dakbayan nga si Saint Joseph the Worker.
Ang mga naglinya nga kalihokan naglakip sa street dancing, lumba sa dragon boat, food fair, ug uban pa.
"Kami nagsaulog sa usa ka post-pandemic nga panghitabo. Human sa duha ka tuig, ang Bohol, isip usa ka nag-una nga destinasyon sa turismo, adunay pipila lamang nga mga bisita, ug karon nga kita balik sa nawong-sa-atubang nga mga kalihokan, kini mao ang atong dalan sa pagpalambo sa industriya sa turismo sa Bohol ug sa atong minahal nga Dakbayan sa Tagbilaran. Mao nga giimbitar namo ang tanan namong mga bisita gikan sa tibuok kalibutan, nagsaulog kami karon sa ‘Saulog Tagbilaran’ Festival,” matod ni Yap.
Giangkon sa mayor nga wala na nibalik sa pre-pandemic level ang gidaghanon sa mga turista.
Base sa datus sa buhatan sa turismo sa Siyudad, 80 porsiyento sa mga kalihokan sa mga turista ang nibalik sa normal uban sa padayon nga pagsaka sa mga nangabot.
Atol sa paglusad niadtong Huwebes, Marso 16, ang organizers nipahigayon og wreath-laying ceremony agig paghandom sa ika-458 nga anibersaryo sa “Blood Compact” tali ni Rajah Sikatuna sa Bohol ug Spanish conquistador Miguel Lopez de Legazpi.
Usa ka reenactment sa makasaysayanong kalihokan ang gipahigayon sa entablado uban sa folk dances ug mga kanta sama sa Kuradang, usa ka tradisyonal nga sayaw sa pagpangulitawo.