Duna nay persons of interest (POI) ang Asturias Police Station sa pagpusil-patay sa barangay kapitan sa Manguiao ug sa asawa niini, sa atubangan sa Asturias Central Elementary School sa Poblacion, lungsod sa Asturias niadtong Marso 14, 2023.
Matod ni Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CPPO) nga dili lang una siya makahatag og detalye sa impormasyon sanglit nagpadayon pa sila sa ilang imbestigasyon.
Ang kuha sa mga CCTV camera nakatabang sa mga imbestigador sa ilang nagpadayon nga pakisusi sa mga mamumuno sa magtiyaong Mario ug Edna Tundag.
Hugot usab nga gihimakak ni Sucalit ang gi-post sa social media sa usa ka Elpidio Benjamin S. Noel nga nag-akusar sa kapulisan nga illegal nga midakop kang Lemuel “Tata” Tundag Aguanta sa iyang pinuy-anan sa Sitio Guinabasan, Barangay Tubigagmanok nga bukirang dapit sa Asturias.
Matod pa niini, niadtong Marso 15, 2023 sa alas 9:00 sa gabii, gisulod sa mga armadong lalaki ang balay ni Aguanta nga walay gipakita nga warrant of arrest ug search warrant.
Sakay ang maong mga armado sa tulo ka sakyanan, duha niini pick-up, ug dayong ransack sa balay ni Tata Aguanta ug gipahapa ang mga kauban niini sa sulod sa balay ug gipangrekisa.
“Those 10 armed men directed Tata and companions to lie down on the floor and gikapkapan sila tanan aron masiguro nga walay armas gibitbit si Tata Aguanta ug mga kauban. Cleared, those 10 men fuerzadong giguyod si Tata Aguanta aron ihansak sa usa sa ila sakyanan,” matod sa post.
Gidala matod pa si Aguanta sa karomahan sa barangay ug didto gibutangan og plastik ang tibuok ulo hangtod nga gipakuryentihan ug gipatug-an kon siya ba ang nagpatay sa magtiayon.
Matod ni Sucalit, gidakop si Aguanta tungod sa kaso sa armas ug walay kalabutan ang giingong pasangil nga siya ang gidudahan nga nagpatay sa kapitan.
Nakuhaan kini og kalibre 45 ug usa ka 9mm pistol lakip na ang mga bala niini human nga wala makapakitag lisensya nga magtiner siya niini.
Giklaro usab ni Sucalit nga dili suspek si Aguanta sa pagpatay sa kapitan ug sa asawa niini.
Bisan pa man niini, ang hepe sa CPPO nga si Police Colonel Rommel Ochave, mimando sa kapulisan sa Asturias pagpaubos sa imbestigasyon labot sa pasangil sa social media.
Dili motugot ang hepe sa CPPO nga mohimo og illegal nga kalihukan ang iyang mga personnel.