Maestro gisumbag sa retiradong sakop sa Philippine Coast Guard (PCG) nga amahan sa tag-iya sa pribadong tunghaan sa Barangay Cotcot, lungsod sa Liloan, alas 12:49 sa kaadlawon sa Dominggo.
Si Paolo Catarina Mollena, ulitawo, 24, lumad, taga lungsod sa Catmon ug maestro sa Academic and Skills Development School sa naasoy nga dapit, nidangop sa kapulisan tungod sa iyang nahiagoman.
Gitanggong sa Liloan Police Station si Ferdinand Laurente Manto, 56, biyudo retired PCG, taga Dapdap, Barangay Catarman, Liloan.
Si Police Master Sgt. Nelson Sadile, imbestigador sa Liloan Police Station nga nahinabi sa Superbalita Cebu, nagkanayon nga ala 1:29 sa kaadlawon sa Dominggo, ang maestro nisumbong sa ilang buhatan.
Matod ni Sadile, nagbantay siya sa mga estudyante atol sa ilang activity sa camping sa tunghaan.
Ang suspek nga si Manto, kinsa amahan sa tag-iya sa tunghaan, niduol sa maestro ug gisugo niya nga ipapangita sulod sa school campus ang usa ka trabahante sa tunghaan.
Apan na-busy ang maestro sa pag-atiman sa mga estudyante hinungdan nga wala makatuman dayon ug nasuko ang suspek.
Gisumbag ang biktima ug nahitabo ang komusyon human nangahadlok ang mga tinun-an sa ilang nakita.
"Gikwelyuhan niya ang maestro, pwerting kuroga. Gihulga nga dili nako gusto makakita nimo ugma," dugang ni Sadile, subay sa saysay sa maestro.
Human sa pagkwelyo gisukmag sa suspek ang biktima nga maestro. Sa kalisang sa maestro, nagkamangkamang sa paggawas sa tunghaan ug nangayo og tabang sa iyang isguon ug nangadto sila sa buhatan sa kapulisan.
Sa pagrespondi sa kapulisan, napusasan ang suspek.
Si Manto, nahinabi sa Superbalita Cebu, nangayog pasaylo sa iyang sayop nga nabuhat.
"Una sa tanan, mangayo kog pasaylo niya. Dakong sayop akong nabuhat. Nainit lang ko, nakalitan," dugang ni Manto.
Gipadayag niya nga nagmahay siya sa sayop nga nabuhat. Sumala pa niini nga mikalit og saka ang iyang dugo niadtong higayuna. (GPL)