Makaingon kitang dakong balit-ad kon ang atong gitan-aw nga sulbad sa usa ka suliran makapagrabe na hinuon sa maong suliran. Sama sa Cebu Bus Rapid Transit (CBRT) project, ang unang mass transport system nga gipatuman dinhi sa siyudad sa Sugbo. Temporaryo ra hinuon kini.
Ang CBRT mobalor og P17 bilyones ug maglangkob sa 13.8 ka kilometro nga segregated lanes gikan sa Bulacao ngadto sa Talamban. May rota sab kini gikan sa South Road Properties paingon sa IT Park. Ang CBRT dunay 17 ka mga estasyonan, usa ka depot ug usa ka trunk terminal.
Kon hingpit na nga magamit ang CBRT, gibana-bana nga moabot sa 60,000 ka mga pasahero ang mogamit niini matag adlaw. Tungod sa kadako sa kapasidad niini, gipaabot nga mahawan ang mga karsada sa ubang mga sakyanan. Kon matinuod.
* * *
Gisugdan na sa pagpatuman ang Package 1 sa CBRT pipila ka semana ang milabay. Kini maglangkob sa rota gikan sa Cebu South Bus Terminal sa N. Bacalso Ave. ngadto sa Kapitolyo agi sa Osmeña Blvd. sa siyudad sa Sugbo
Tungod niini, dunay mga bahin sa Osmeña Blvd. nga nahimo na lang nga usa ka lane sa matag habig. Unsa man ang epekto? Pwerteng trapika panahon sa rush hour kay ang upat ka lanes nahimo na man lang nga duha ka lanes.
Nganong ginganlan man sab ni og rush hour, ang panahon nga hapit ang tanan magdali? Ang resulta hinuon, kay hapit ang tanan anaa man sa karsada, grabe kahuot ang trapik. Imbis magdali, malangay na hinuon.
* * *
Nagping-it na intawon ang mga sumasakay nga moagi sa Osmeña Blvd. Mag-aginod ang dagan sa mga public utility jeepney. Ang uban maghabal-habal na lang aron di ma-late sa ilang trabaho. Mas dako na ang ilang pleti kay sa pleti sa jeepney.
Dunay nag-ingon nga nibalik na sa normal ang siyudad sa Sugbo kay nihuot nag balik ang trapik sa kadalanan. Apan nisamot sa Osmeña Blvd. tungod sa pagpatuman sa CBRT. Wa diay temporaryo nga rerouting scheme ang mga opisyales sa trapiko sa siyudad?
Nahinumdom ko nga sa bata pa ko, patumaron tag pait nga tambal sa atong sakit. Maayo ra man sab hinuon. Ang pagpatuman sa CBRT mao ang pait nga atong masinati. Kon kini ba ang makaayo sa kahuot sa atong trapiko, wa pa ta kahibawo.