Maghilak ang adlaw kon walay masikop ang kapulisan nga nagpayuhot og gidiling druga. Dili bastabasta ang resulta sa ilang operasyon ning ulahi, minilyon ang kantidad sa mga nasakmit. Apan ‘yanong mga tawo’ ang nasikop sama sa construction worker, kawani o istambay lang.
Dayag kini nga timailhan nga misiaw na pagbalik ang negosyo sa gidiling drugas human medyo milurang na unta panahon sa administrasyon ni kanhi Presidente Rodrigo Duterte. Laing mapait nga kamatuoran, walay nasikop nga dakong personahe sa sindikato.
Subo nga pamalandungon, pipila sa mga dinakpan ningtug-an nga ang nagsugo kanila sa paghatod sa druga o shabu naa sud sa bilanggoan sama sa Cebu City Jail. Apan way nigawas nga taho kon dunay gihimong aksiyon ang awtoridad batok sa maong binilanggo.
Matod pa sa tinambay nga pulong, ‘hilom pa sa tirana.’ Dili lang kausab apan makadaghan kini nakutlo sa taho. Busa, dili nato malikayan ang pagduda. Dili kaha dunay kunsabo sa tagdumala sa bilanggoan? Maapiki gihapon ang imahen sa kapulisan.
Ug sama sa mogawas nga ‘pang-accomplishment’ lang ang operasyon sa kapulisan ug Philippine Drug Enforcement Agency (PDEA) aron dunay ikataho sa kampanya sa gidiling druga. Pang-record alang sa promusyon? Pwera lang sa mga nagtinarong sa serbisyo nga napagan sa salawayon.
Dinhi sa Sugbo, dunay mga inilang personahe nga gidudahang nagpadagan sa sindikato sa druga uban sa ilang internasyonal nga koneksiyon nga kasagaran gikan sa China. Way kisaw. Wa sila matandog. Sama sa mga ginagmay nga isda sa grupo ang nasignit, ang uban nagbalikbalik na gani sa pagkasikop.
Hagit kini sa awtoridad nga mopakita sa ilang matinud-anong labok. Apan mas hagit usab kini sa katawhan o publiko sa kinatibuk-an. Mas malampuson ang awtoridad ubos sa hugot nga kooperasyon sa mga molupyo nga labing nasayod sa kalihokan sa ilang palibot.
Kaakuhan sa tanan ang pagsumpo sa pag-abuso sa gidiling druga.