Dili mominos P3.1 milyunes nga balor sa shabu ang nasakmit sa ronda sa Barangay Mabolo, siyudad sa Sugbo, alas 9:45 sa gabii sa Sabado, Marso 18, 2023.
Ang nadakpan mao si June Albert Ylaya alyas Pangit, hingkod ang edad, ug molupyo sulod sa sam-ang sa mga Insek sa Barangay Carreta, siyudad sa Sugbo, kinsa gihulagway sa kapulisan nga regional high value individual sa negosyo sa illegal nga druga.
Ang grupo ni Police Lieutenant Colonel Dindo Juanito Alaras, hepe sa City Drug Enforcement Unit (CDEU) sa Cebu City Police Office (CCPO), maoy nangulo sa gihimong anti-illegal drug operation.
Nasakmit sa kapulisan ang moabot sa 470 gramos sa gidiling druga nga gibanabana nga P3.1 milyunes sa standard drug price sa Dangerous Drugs Board.
Matod ni Alaras, una nang nasikop si Ylaya niadtong 2002 apan dihang nakagawas sa bilanggoan, nitumaw na usab ang ngalan ni Ylaya nga tinubdan sa ubang nadakpan.
Dugang ni Alaras, ang maong dinakpan kauban sa usa ka Roberto Cado Ludong ug giingong kining duha maoy responsable sa sunodsunod nga mga patay sa Carreta.
Ang nadakpan nga si Ylaya, gitanggong na sa kapulisan, mag-atubang og kaso nga kalapasan sa Republic Act 9165 o Dangerous Drug Act of 2002.