Usa ka lodging house sa dalan Leon Kilat, Barangay Kalubihan sa downtown area sa dakbayan sa Sugbo nga gihimong suyopanan o drug den, gironda sa Philippine Drug Enforcement Agency (PDEA) 7 uban sa kapulisan sa Carbon Police Station, alas 7:40 sa gabii sa Sabado, Marso 18, 2023.
Ang pagronda niresulta sa pagkasikop sa lima ka mga tawo, usa niini maoy nagmintinar sa drug den nga si Archie Villanueva, 42, cellphone technician.
Ubang nadakpan mao sila si Job Esdras Zamora, 40, safety officer sa usa ka construction company; Leonila Mendez, 37; Crestituto Diyagbel, 52, tindero; ug Ronel Ochia, 43, construction worker.
Nakuha sa mga operatiba sa PDEA 7 ang 18 ka pakete sa gituohang shabu nga motimbang sa 20 gramos nga dunay standard drug price nga P136,000 lakip na ang mga gamit sa pagsuyop sa shabu.
Matod ni Leia Albiar-Alcantara, information officer sa PDEA 7, nihimo sila og usa ka semana nga case build-up human makadawat og impormasyon ang ilang ahensya gikan sa usa ka confidential informant labot sa pagpadagan sa drug den sa maong lugar.
Giingong nag-abang lang og kuwarto si Villanueva sa maong lodging house ug taudtaod na niya nga gihimong suyopanan labi na sa construction workers nga nagtrabaho sa kasikbit nga dapit.
Giila sa PDEA 7 nga usa ka dakong impact ang pagbungkag sa drug dens sanglit mao kini ang gihimong breeding ground sa mga kriminal nga makahimo og kasamok sa usa ka dapit.
Ang mga dinakpan gitanggong sa kapulisan ug gikatakda nga pasakaan og kaso karong adlawa, Marso 20, 2023, sa kalapasan sa Republic Act 9165 o Comprehensive Dangerous Drugs Act of 2002. (PR, RRM)