SAMTANG ang kadaghanan nalingaw ug nidayeg sa mga nisalmot sa Parada Dabawenyo 2023, apan luyo sa panan-aw ug sa kalingaw, usa ka reporter gikan sa SunStar Davao nakiglalis sa usa ka personahe sa auxiliary.
Niadtong Marso 18, 2023, mga 9:00 sa buntag, didto sa media box o lugar nga gidesignar sa mga sakop sa media nga maoy mokober ug mokuha og katikaran sa kalihukan, si Ian Espinosa, SunStar Davao reporter, nakiglalis sa usa ka auxiliary nga naka-duty sa dihang nakahukom siyang mobalhin sa landong nga bahin.
"That time gi-ask ko asa ko padulong, then niani ko media man ko sir gusto ko mohawa sa media box didto na ko gikan. Then ana siya bawal man dili VIP diri," matud ni Espinosa.
"Nihangyo ko og pwede mosulod kay naa na poy laing media didto. 'Tas niana siya gahi man kay ka’g ulo. Then iya kong i-attempt ug kwelyo," dugang pa niya.
Tug-an niya nga una nakaliab ang auxiliary kaniya, iyang gipahibawo og usab nga reporter siya nga nagkober sa kalihukan.
Namatikdan ni Espinosa nga ang tonada sa auxiliary medyo inisog, nga nakapangangha kaniya.
Kay miingon man lang siya nga buot lang siyang mobalhin ngadto sa medyo landong nga lugar kon diin tua sab ang ubang mga sakop sa media.
"Ang media box bantang sa init, siguro og laing tao pa to, di pud sya gusto didto sa kamaot na pwesto didto. Kung cameraman ka didtong dapita di ka kabantay na maabot sila mayor, si president etc.," dugang niya.
Gani daghang mga tigbalita mihangyo nga mobalhin gikan sa init nga media box.
"Pero mga 10 a.m. pa ata sila nakahawa kanang sakit na kaayo ang init then tanan mi media is nangadto didto sa landong na part," butyag niya.
Gisulti ni Espinosa nga nasakitan siya sa gibuhat kaniya sa auxiliary.
"To be honest, I was offended with how the auxiliary treated me. And for sure other media had been told that way, di lang ako," pagseguro niya.
Sa sunod, naglaum siya nga ang auxiliary ug mga event marshals magtratar og maayo sa sakop sa media.
Nasayran nga di lang kini maoy unang higayon nga ingon niini ang pagtratar sa sakop sa media sa pipila ka marshalls. Human sa insidente, daghan pang ubang mga sakop sa media nag-asoy sa ilang samang kasinatian sa mga marshalls atol sa Araw ng Dabaw ug sa Kadayawan Festival.
Samtang sa paghinabi uban ni Public Safety and Security Office (PSSO) Head Angel Sumagaysay niadtong Marso 19, matud niya nga ilang imbestigahan ang insidente apan nagkanayon nga ang media box alang sa Davao City Information Office (CIO).
Sulti niya nga ang lugar gidestino ngadto sa CIO aron nga malikayan nga mahitabo ang komprontase.
"Kay basin magkaroon na naman ng confrontation ang security [and media]. Kay ang security pag-ingnan na nimo sila nga diha, diha ra gyud na sila," pagtin-aw niya.
Nakita sab sa opisyal nga mga sakop sa media mibiya sa gidesignar nga lugar atol sa kalihukan.
"Nakita ko nga naghawa gyud sila didto kay init," pagtataw ni Sumagaysay.
Samtang si CIO Head Harvey Lanticse ug Parada Organizer Harold Quibete nag-"reach out" ngadto sa SunStar Davao human sa insidente ug managlahi nga nangayo og pasaylo. Gipasalig sab ni Lanticse nga ilang idangop kini ngadto sa hingtungdang buhatan.