GITUG-AN sa Davao City Public Safety and Security Office (PSSO) nga malampuson ang Parada Dabawenyo 2023 ug way mga wa damhang hitabo ang nataho.
"Very successful siya and ang kalami ato kay target nato nga before 12 noon na-hit gyud nato," tug-an ni Angel Sumagaysay, PSSO head sa paghinabi uban sa SunStar Davao niadtong Marso 19, 2023.
"Hapsay kaayo ang parada tungod very clear ang exit area wala niingon nga nabara ug ma-delay ang nagsunod, so tuloy-tuloy sila didto [San Pedro Street]," dugang pa niya.
Kinatibuk-ang 277 ka entrante ug mga 15,000 ka indibiduwal nisalmot sa Parada Dabawenyo 2023.
Dugang pa niya nga bisan tuod kon dunay mga nataho nga mga insidente nga nakuyapan, "isolated cases" lamang kini.
"Gamay ra kaayo, tungod sa kainit but wala gyud giingon nga gidala sa hospital naa man atoang mga medical team along the road tapos naa pud diha sa may Rizal Park so nahatagan dayon og first aid," pagtin-aw niya.
Gidayeg sab niya ang mga Dabawenyo kay nakig-alayon.
"Nagapasalamat ta sa mga tao gyud nga nag-cooperate para mahimong successful atong event," panapos niya. (KSD)