AWAY sa pamilya ang gilantaw nga motibo sa mga awtoridad sa pagpamusil patay sa magtiayon alas 8:15 sa buntag niadtong Dominggo, Marso 18, sa Sultan sa Barongis, Maguindanao del Sur.
Mga biktima giila nga sila Sittie Samra Angas Sedik ug Sukarno Mongangan Sedik, molupyo sa Sitio Baluntaya, Barangay Bulod sa nahisgutang lungsod.
Matud ni Sultan sa Barongis Chief of Police Lieutenant Alfred Gregory, duha ka wala mailhing suspek ang misulod sa balay sa magtiayon ug gipamusil gamit ang kalibre .45 nga pistola ug daling misibat sakay sa motorsiklo paingon sa hilit nga dapit sa lugar.
Mga biktima pulos nakaangkon og daghang mga samad sa lawas hinungdan sa ilang kamatayon.
Hustisya karon ang gisinggit sa pamilya sa mga biktima samtang mga pulis sa Sultan sa Barongis Municipal Police Station padayon nga pagpangita sa mga suspek aron nga madakpan.