Money punch motabang sa Pinoy boxers

MONEY PUNCH: Ang tag-iya sa Money Punch Promotion nga si German-Australian Christian Faust (wa) kauban ang labing una niyang gikuha nga professional boxer nga si Nino Rio “Pitbull” Saoy (tuo). / Erwin S. Lirazan
MONEY PUNCH: Ang tag-iya sa Money Punch Promotion nga si German-Australian Christian Faust (wa) kauban ang labing una niyang gikuha nga professional boxer nga si Nino Rio “Pitbull” Saoy (tuo). / Erwin S. Lirazan

Adunay bag-ong natukod nga boxing promotional outfit sa Sugbo nga seryusong nagtutok sa usa ka tahas – tabangan ug giyahan ang batan-ong Pinoy nga mga boksidor paingon ngadto sa kalampusan.

Ning bag-uhay lang, pormal nga gipaila sa Cebu sports media ang Money Punch Promotion nga gipanag-iya ni Christian Faust, usa ka German-Australian nga dugay na nga nagpuyo sa Lapu-Lapu City, Cebu ug minyo sa usa ka Pinay.

Isip pasiunang lakang kabahin sa iyang tinguha, nibuhi og suporta si Faust sa Villamor Boxing Gym nga nahiluna sa Pagsabungan, Mandaue City ug gipanag-iya ni kanhi two-time world title challenger Edito Villamor.

Nagkanayon si Faust nga wala siya nagmakuli sa pagsuporta kang Villamor hilabi na dihang nasayran niya nga nag-training kini og batan-ong amateur boxers nga wala’y bayad.

“Money Punch is about working with people like coach Villamor who is really engrossed in the boxing grassroots program. Money Punch is also bringing opportunity to those less fortunate children to grow into responsible adults. That’s our first objective,” matod ni Faust, kinsa nagpuyo na sa Sugbo gikan pa niadtong 2008.

Gipasabot ni Faust nga kanhi sab siya usa ka uyamot hinungdan nga tinguha niyang ipaambit ang mga grasya nga iyang nadawat pinaagi sa pagtabang sa mga batan-on nga magiyahan sa saktong dalan.

“Dugay nako nangandoy naay mo-support sa akong amateur boxing program. Lipay kaayo ko ani, it’s a big factor sa mga bata diri sa Cebu. Mas modako ang interes sa mga bata kay naa na gyud ni-support. Dili na lisod sa ako-a nga mangayo pa ko og sponsors,” batbat ni Villamor.

Si Villamor kasamtangang nagpasiugda og binuwan nga amateur grassroots boxing tournament sa VBG nga gisuportahan sa Money Punch ug PMI Boxing Promotions.

Giklaro ni Faust nga dili lang kutob sa amateur ang iyang pagsuporta. Gusto niyang agakon ang batan-ong amateur boxers hangtod na sa professional rank ug hatagan kini og oportunidad nga makakulit og dakong pangalan sa ugma damlag.

“Money Punch aims to develop amateur boxers and give them opportunity to progress and train and learn from experts like Villamor who achieved greatness,” dugang ni Faust.

“A lot of young fighters aren’t given the opportunity because of the lack of fundings. It’s not just in the Philippines but around the world.”

Nagplano si Faust nga mopasiugda sa labing una niyang professional boxing event karong Abril o Hunyo, 2023 dinhi sa Sugbo.

Moaway ning maong promosyon ang labing unang gikuha ni Faust nga professional boxer nga si kanhi Muay Thai champion ug MMA fighter Nino Rio “Pitbull” Saoy.

Gawas sa boksing, ang Money Punch nagplano sab nga motabang sa ubang combat sports sama sa Mixed Martial Arts (MMA), bare knuckle fighting, ug Jiu-Jitsu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph