TAHO sa danyos sa mga imprastraktura sa Davao de Oro niabot na og P274 milyon human miigo ang tulo ka mga kusog nga linog nga magnitude 6.0, 5.9 ug 5.6.
Sa bag-ohay nga taho sa Davao de Oro Provincial Disaster Risk Reduction and Management Office (PDRRMO-Davao de Oro) niadtong Marso 19, 2023, kinatibuk-ang danyos sa imprastraktura naa sa P274,053,961 nga nakaapekto sa 229,647 pamilya o 779,918 ka indibiduwal ug 194,057 panimalay — ang hiniusang report sukad Pebrero 1 (F1), ug Marso 7 ngadto sa 8,2023 (M7) nga linog.
Uban sa danyos, P74,200,000 mao ang kadaut sa pasilidad sa panglawas — Davao de Oro Provincial Hospital sa Pantukan (DdOPH- Pantukan) kantidad og P1.2 milyon, DdOPH-Laak P5 milyon kantidad sa kadaut, DdOPH- Montevista gitahong dunay P1 milyon nga danyos ug P65 milyon gikan sa kanhi linog F1, ug DdOPH Maragusan gitaho nga dunay P2 milyon.
Unya kinatibuk-ang 33 ka pasilidad sa panglawas ang nadanyos -- 22 ka health centers atol sa F1 samtang 11 sa M7.
Gitaho sa PDRRMO-Davao de Oro nga kinatibuk-ang 16 ka dalan ang nadaut, walo ka tulay ug imburnal.
Apil ang kinatibuk-ang 465 ka centers sa gobyerno -- 280 sa F1 nga linog samtang 185 sa M7.
Gawas sa mga centers, duna say 283 ka mga gambalay nga tulunghaan nga nadanyos — 163 nadanyos nga mga imprastraktura sa F1 nga linog samtang 119 sa M7.
Samtang kinatibuk-an sab nga danyos sa mga balay naa karon sa kantidad sa P70,009,000 uban sa 5,441 ka mga balay -- 894 balay totally damaged samtang ang 4,547 partially damaged.
Tungod sa mga nadaut nga mga balay, dunay 9,873 ka pamilya ang nadislokar -- 5,822 sa F1 nga linog samtang 4,051 sa M7 nga linog. (KSD)