PIPILA ka mga lumad gikan sa mga lungsod sa Davao del Norte ug Davao de Oro ang misalmot sa gipahigayong Unity Walk sa Tagum City Lunes sa buntag, Marso 20, 2023.
Kini aron ipanawagan ang pagrespeto sa desisyon ni Pangulong Ferdinand "Bongbong" Marcos Jr. nga ipabilin ang prangkisa sa Northern Davao Electric Cooperative (Nordeco) Inc. sa pipila ka lungsod sa probinsiya sa Davao del Norte ug sa Davao de Oro.
Sa report sa Radyo Pilipinas Davao, mga nahisgutan nga grupo nagagikan sa nagkadaiyang sektor sama sa kooperatiba, kababaihan, religious group, mga lumad ug uban pa.
Sa miaging tuig, gi-veto ni Pangulong Marcos Jr. ang Republic Act 10554, diin sa usa ka giduso nga balaudnon migula alang sa pagpalapad sa prangkisa sa Davao Light and Power Company (DLPC) sa Davao del Norte ug Davao de Oro hulip sa kasamtangang ga-suplay og elektrisidad nga Nordeco.
Human sa unity walk milagda ang mga nangapil og usa ka "manifesto" isip timaan sa ilang pagsupak sa bag-ong upat ka mga sugyot-balaudnon nga anaa sa Kongreso.
Sa press release nga gipadala sa Nordeco daan na silang nagtukaw luyo sa pagsaulog sa International Women's Month aron batokan ang planong "privatizations" nga giingong tinguha sa DLPC.
Kauban sa pagtukaw sa Prayer Vigil ug Candle Lighting mao ang Coalition Against Privatization of Electric Cooperatives (CAPECs) ug ang National Center of Electric Consumers Cooperative (NCECCO), Marso 8, 2023 didto sa Barangay Canocotan, Tagum City, Davao del Norte.
Ang maong aktibidad milungtad gikan alas 5:30 sa hapon padung alas 8 sa gabii uban sa nagkadaiyang grupo nga misuporta sa pagbatok sa sugyot-balaudnon nga House Bill (HB) Nos. 5077, 6740, ug 7047 nga nagtumong sa pagpalapad sa franchise DLPC sa mga siyudad sa Tagum ug Island Garden City of Samal; ug sa mga munisipalidad sa Talaingod, Asuncion, Kapalong, San Isidro, ug New Corella, Davao del Norte, ug sa Maco, Davao de Oro, suma ni Pastor Angelico Cofreros, CAPECs Chairperson.
Tubag niini, gilayong natigayon sab ang "Awareness Caravan" sa isyu sa elektrisidad sa Davao del Norte, Marso 13, 2023 ning siyudad.
Ang maong awareness caravan gipangunahan sa Davao Consumer Movement, Tagum City Chambers of Commerce ug daghan pang negusyante nga nagtumong sa isyu sa elektrisidad sa Davao del Norte.
Sumala sa negusyante nga si Larry Y. Rubinos (LYR), usa sa mga nagpasiugda sa awareness caravan nga nasubo siya sanglit daghang mga negusyante nagpasibaw sa mulo labot sa ilang sitwasiyon.
Sa gipahigayon sab nga press conference sa Nordeco alang sa pagpasibaw sa ilang bahin, ilang paningkamot nga makasuplay og epesiyente nga suplay sa kuryente.
Sumala ni Nordeco Acting General Manager Elvera Alngog nga matubag ang mulo sa katawhan pinaagi sa ilang pakiglambigit karon sa mga renewable power sources diha sa gihatag nga subsidiya sa usa ka mega watt gikan sa National Electrification Administration (NEA) ug ang paningkamot sa pagpahiluna sa sub-marine cable didto sa Island Garden City of Samal (Igacos).
Dako sab ang pagtuo sa Nordeco nga ang upat ka mga sugyot-balaudnon nga anaa sa Kongreso karon, mabasura sab kini.
"Dili kini babag aron kami padayon nga mohatag og serbisyo, himuon namo kining hagit aron mas mapanindot pa ang among serbisyo ngadto sa katawhan duyog usab sa among makanunayong pag-ampo kay tungod luyo niining tanan, ang Nordeco still fighting."