NAHIMONG hisgutanan sa Barangay 76-A, Bucana, Davao City ang usa ka pato human nga alegasyong gilugos kini sa usa ka lalaki nga nalisoan gikan sa maayong pangisip.

Niadtong Huwebes, Marso 16, 2023, naistoryahan sa mga residente sa usa ka purok sa maong barangay ang nahitabo sa pato ni alyas Ester.

Sa impormasyon nga nakalap sa Superbalita Davao gikan sa kasaligan nga impormante nga perteng yawyaw ni Ester dihang dili na katindog ang iyang babaye nga pato.

Ang silingan nga si alyas Tata nitabi nga iyang nakita si alyas Roel nga gikamang ang pato unya perteng duot-duot sa kinatawo niini sa sampot sa pato nga giayo'g gunit ang duha ka mga tiil.

Nagtuo si Tata ug Ester nga napiang gayod ang pato human nga dili na kini katindog, apan niadtong Sabado mora kuno'g naarang-arang na subay sa impormante sa Superbalita.

Tungod sa hitabo, gipahibalo ni Ester ang ginikanan ni Roel ug napatala ang hitabo sa barangay.