Ang PNP Officers’ Ladies Club (OLC) Region 7 ang mopasiugda og dinner concert for-a-cause “Amore: A Night of Music and Compassion” uban sa OPM Pop Diva nga si Kuh Ledesma, karong Sabado, Marso 25 nga ipahigayon sa Atlantic Hall, Waterfront Cebu City Hotel and Casino.
Kita sa maong concert gitagana sa ilang beneficiaries nga mga PNP personnel nga nag-antos sa sakit nga cancer.
Gipahibawo ni Leslie Lim, OLC Region 7 president atol sa gipatawag nga press conference nga gipahigayon sa Morii restaurant, Streetscape Banilad nga adunay 45 ka mga PNP personnel nga sakop sa Region 7 nga nipaubos sa chemotherapy ug renal dialysis.
Matod pa ni Lim, kapikas sa city director sa Lapu-Lapu City Police Office P/Col. Elmer Lim nga unang higayon nila nga mopahigayon sa maong kalihukan, gawas sa ilang naandan nga feeding program ug distribution sa school supplies sa kabataan.
Pasabot ni Lim nga iyang nakita nga ang general public makatambong sa maong concert itandi sa pag-organize og shoot fest o golf tournament diin pipila lang ang maka-join alang sa susamang katuyoan.
“As PNP wives, we believe that we are here to support our husbands and contribute in any way we can. We want to be of purpose to the PNP organization,” dason ni Lim ngadto sa mga sakop sa entertainment press.
Ang “Amore: A Night of Music and Compassion” gawas ni Kuh anaa ang Popera artist nga si Jonathan Badon, Charity Diva Token Lizares, “Asia’s Got Talent” semi-finalist Angel Mistress, ug ang Boholano theater actor-singer Genreid Estrada.
Giawhag ang publiko sa pagsuporta sa maong katuyoan ug sa mga interesado sa tickets, kini mapalit sa ticketing booth sa Waterfront Hotel ug SM Tickets sa P4,000 with dinner (VIP), samtang P1,000 (General Admission). (FVQ)