Usa ka na-discharge nga sundalo nga gikonsiderar nga “major player” sa pagpatay kang Negros Oriental governor Roel Degamo mitahan sa mga awtoridad, sumala ni Interior Secretary Benhur Abalos Jr. sa Lunes, Marso 20, 2023.
Sa press conference sa Joint Task Force Degamo sa Department of Justice office sa Manila, si Abalos niingon nga ang suspek nitahan sa usa ka military unit sa Negros ug gi-turn over sa National Bureau of Investigation (NBI).
Si AFP Chief of Staff General Andres Centino niingon nga ang suspek nitahan sa Biyernes, Marso 17, ug gidala siya sa Manila niadtong weekend.
Matod niya, ang suspek nagkupot og “vital and critical information” nga makatabang sa hinanaling pagsulbad sa pagpatay kang Degamo.
Ang task force nagdumili sa pagbutyag sa bisan unsa nga impormasyon mahitungod sa suspek, apan si Justice Secretary Jesus Crispin Remulla niingon nga siya usa ka “direkta nga partisipante” ug ginganlan sa ubang gunmen -- sila si Joric Garido Labrador, Joven Calibjo Javier, ug Benjie Rodriguez, kinsa naunang gidakop sa kapulisan ug niangkon nga nalambigit sa pagpatay kang Degamo.
“Very critical ang information niya, one of the main players dito sa naganap na pangyayari itong taong ito kasama siya. Marami na siyang sanabi pero vinavalidate pa natin muna lahat para malaman natin kung gaano katotoo lahat yan bago natin isama sa case information,” matod ni Remulla.
“’Yung mga sinasabi niya (his statement) corroborates the previous statements given to us and he knows the other people who were involved kaya alam natin ‘yung extent ng network,” dason ni Remulla.
Sa dihang gipangutana kon ang misurender nga suspek makaila ba sa utok sa pagpatay kang Degamo, ang justice secretary niingon nga “posible kaayo.”
Matod ni Abalos nga sa pagkakaron, 30 na ka mga reklamo ang gipasaka batok sa upat ka nasikop nga mga suspek ug 12 ka John Does kalabot sa pagpatay kang Degamo ug laing walo ka indibidwal sa lungsod sa Pamplona niadtong Marso 4, 2023.
Kini nga mga reklamo naglakip sa siyam ka mga kaso sa pagpatay, 15 alang sa frustrated murder, tulo alang sa pagsulay sa pagpatay ug tulo alang sa paglapas sa balaod sa armas ug bala.
Una na nga gihinganlan ang upat ka nadakpan nga mga suspek nga si Negros Oriental Third District Representative Arnolfo Teves Jr. maoy mastermind sa pagpatay apan gihimakak sa magbabalaud.
Dugang ni Remulla nga taliwala sa nagpadayong imbestigasyon, “there are circumstances that would lead you (to believe) that he (Teves) was perhaps involved in the crime.”
“But the specifics of that we cannot tell you,” dason niya.
Si Remulla nipadayag og pagtuo nga adunay lig-on nga kaso ang gobiyerno batok sa mga sad-an sa pagpatay kang Degamo. (SunStar Philippines)