Kontrata sa M.E. Sicat sa CCMC pormal nang giputol ni Rama

Human sa dili mominos upat ka buwan sukad sa paghunong sa trabaho sa kontraktor sa Cebu City Medical Center (CCMC) sukad niadtong Nobiyembre 2022, wala pay bag-ong kontraktor nga nisalo sa trabaho niini.

Si Mayor Michael Rama nipahunong sa trabaho P907 milyunes nga kontrata tali sa M.E. Sicat Construction Inc. sa pagtiwas sa ika-8 hangtod ika-10 nga andana sa CCMC tungod sa giingong kalangay sa dagan sa trabaho.

Si Rama pormal nga niputol sa kontrata tali sa M.E. Sicat sa Enero 18, 2023 human ang Contract Termination Review Committee (CTRC) nga gipangulohan ni Atty. Carlo Vincent Gimena nipasar og resolution alang sa “mutual termination” human nitugot ang kontraktor nga dili na usab mopadayon og trabaho sa CCMC, kansang kontrata ilang nadaog niadtong Abril 6, 2022.

Niadtong Enero 20, 2023 si Rama nipadala og suwat ngadto kang Engr. Michael Allan Sicat, president ug chief executive officer sa M.E. Sicat Construction Inc. para sa pormal nga pagpahibawo.

“Upon recommendation of the Contract Termination Review Committee (CTRC) thru its Resolution No. CTRC-001-2023 dated January 18, 2023 which has been attached herewith and made an integral part hereof, I, being the Head of the Procuring Entity of the Cebu City government, hereby approve said recommendation, and mutually terminate the Construction Agreement dated April 6, 2022 entered into by and between the Cebu City government and ME. Sicat Construction, Inc,” tipik sa suwat ni Rama.

Ang mayor unang nibutyag nga dili na siya moagi sa public bidding sa pagtiwas sa CCMC sanglit napul-an na siya sa maong paagi nga hangtod karon pabilin pa kining wala matiwas.

Si Atty. Collin Rosell, executive secretary to the mayor, nagkanayon nga aron pagtiwas sa katukoran sa maong tambalanan, posible kining ipaubos sa public-private partnership.

Ang mayor unang nipahunong sa construction sa CCMC niadtong Nobiyembre 2022 gumikan kay wala siya matagbaw sa performance sa contractor, kinsa unom pa ka buwan gikan sa ilang pagtrabaho.

Atol sa 86th Charter Day sa Cebu City, si Rama nihatag og gibug-aton sa paghuman sa katukoran sa CCMC diin ang City Government dili na mogasto bisan usa ka sentimo gikan sa panudlanan sa Dakbayan ug tiwason ang edepisyo sa buwan sa Nobiyembre 2023.

Gumikan niini, padayon ang “marketing investment” ni Rama aron pag-agni sa mga business tycoon sa Pilipinas nga motabang sa dakbayan alang sa Singapore-like Cebu City nga programa sa kasamtangang administrasyon.