Tulo ka diversion road projects sa dakbayan sa Lapu-Lapu nga magdugtong sa Sudtonggan sa Brgy. Basak ngadto sa Brgy. Gabi sa lungsod sa Cordova, George Tampus Road sa Brgy. Basak hangtod sa Kaloko/Timpoloc sa Brgy. Babag ug Pakpakan sa Brgy. Basak hangtod sa Collinwood gipaabot nga trabahuon sa hinapos ning tuiga.

Matod ni Mayor Junard ‘Ahong’ Chan, City Government ug ang buhatan sa iyang asawa nga si Lapu-Lapu Lone District Rep. Ma. Cynthia Chan, nigahin og pundo alang sa maong mga proyekto nga gipaabot nga makapaluag sa trapiko sa dakbayan. Hinuon, wala pa gibutyag ni City Engineer Perla Amar ang kinatibuk-ang gasto sa mga proyekto ug tinubdan sa pundo.

Apan, si Atty. Michael Dignos, kanhi konsehal sa Lapu-Lapu, niingon nga kinahanglang seguradohon nga kining mga proyekto sa imprastraktura dili mausik sa pundo sa publiko.

Gawas sa diversion roads, gibutyag usab ni Chan ang upat pa ka dagkong mga proyekto sa imprastraktura atol sa bag-o lang nga “The Dialogue” forum uban sa mga stakeholder sa turismo sa siyudad.

Mao kini ang pagtukod og flyover sa Marigondon Crossing aron matubag ug ma-decongest ang gidaghanon sa mga sakyanan sa maong lugar; tri-level interchange sa ML Quezon Ave., nga iyang gihulagway nga flyover nga magsilbi nga alternatibong rota sa mga gikan sa Barangay Basak paingon sa Pusok o vice versa; ikaupat nga taytayan nga nagdugtong sa Mandaue City ug Lapu-Lapu City; ug ang pagtukod og coastal highway padulong ug gikan sa ikaupat nga taytayan.

Ang tri-level interchange sa ML Quezon, matod ni Chan, magtugot sa free-flowing nga trapiko ug makapakunhod sa gidaghanon sa mga sakyanan sa traffic light paingon sa unang taytayan. Hinuon, ang mayor niingon nga ang Siyudad wala pa mogahin og pundo alang sa maong mga proyekto.

Ang mayor, niadtong Pebrero 22, nitug-an sa SunStar Cebu nga ang Department of Public Works and Highways (DPWH), uban ang financing gikan sa Japan International Cooperation Agency (Jica), mohimo og coastal road sa dakbayan nga magdugtong sa ikaupat nga taytayan ug ang 400 ka ektarya nga Mactan North Reclamation Development Project (MNRDP).

Siya niingon nga ang DPWH ug Jica nagkasabot nga maghimo og coastal road aron malikayan ang trapiko sa kasamtangan nga circumferential road sa dakbayan kon ang ikaupat nga taytayan mahimo nang operational, ug misaad usab nga abagahon ang gasto sa coastal road atol sa ilang tigom niadtong Enero. Ang ikaupat nga taytayan, gibanabana nga nagkantidad og P76.412 bilyunes, partially funded sa loan nga mokabat sa 120 bilyon yen o halos P50 bilyunes gikan sa Jica.

Gihisgutan usab ni Chan atol sa forum ang pagtukod sa Lapu-Lapu Expressway, nailhan usab nga skyway project, nga gipaabot nga magsugod sa Septiyembre, tungod kay nagpadayon pa ang pag-align sa P24.8 bilyunes nga budget ug molanat og labing menos unom ka buwan. (MKG)