Anak sa tag-iya sa lodging house nga gironda sa Philippine Drug Enforcement Agency (PDEA 7) ug Carbon police Station 5 sa Sabado sa gabii Marso 18, 2023 naa sa bilanggoan sa kasong ilegal nga drugas human siya nadakpan sa buy bust niadtong Marso 8, 2023.

Ang suspek giilang si Kenneth Ongsuco Lerio, 39, taga Barangay Proper, dakbayan sa Toledo apan nagpuyo sa KSL Lodging house. Nakuhaan siya og 25 ka pakete sa gituohang shabu nga motimbang og 35 gramos nga dunay standard drug price nga P238,000.

Tungod niini, mopalawom sa ilang imbestigasyon ang kapulisan sa dakbayan sa Sugbo kon si Lerio ba ang tig-supply kang Archie Villanueva, 42, nga maoy suspetsadong drug den maintainer sulod sa lodging house.

Ang KSL Lodging House sa dalan Leon Kilat, Barangay Kalubihan sa dakbayan sa Sugbo gironda human nasubay sa mga tigpaniid sa awtoridad nga usa sa mga lawak niini gihimong suyopanan og shabu ug lima ka mga tawo ang nasikop sa pagronda.

Nakuhaan si Villanueva og 20 gramos sa gituohang shabu nga mobalor og kapin P100,000.Kasagaran sa iyang mga kustomer mga construction worker ug mga vendor nga naa sa palibot sa Leon Kilat.

Mopatawag usab ang Cebu City Police Office (CCPO) sa mga lodging house owners ug managers aron mapuhag ang paggamit sa ilang pasilidad sa ilegal nga kalihukan ug mapakgang ang posibling laing krimen sama sa human trafficking, sumala ni Lieutenant Colonel Janette Rafter, deputy city director for operations sa CCPO.

“Siguro we will make an effort to organize sa mga tag-iya ani nga mga establishments because it is not only illegal drugs ang pwede mahitabo ana nga lugara pwede sad trafficking, actually naa mi namonitor in some other area regarding sa trafficking,” matod ni Rafter.