Asawa gipusil-patay sa iyang bana sa Purok Talisay, Barangay Poblacion, lungsod sa Compostela, alas 9:15 sa buntag sa Dominggo, Marso 19, 2023.
Si Evelyn Suarez Toledo, 40, minyo, nagpuyo sa nahisgutang lugar, namatay tungod sa samad pinusilan sa iyang dughan.
Ang bana nga suspek giila sa kapulisan nga si Sidney Bacalla Toledo, 40, nisibat human sa krimen ug wa pa masikop sa kapulisan atol ning pagsuwat.
Si Police Staff Sgt. Daryl Rondina, imbestigador sa Compostela Police Station nga nahinabi sa Superbalita Cebu, nagkanayon nga selos ang motibo sa krimen.
Matod ni Rondina, ang biktima nagbantay sa ilang sari-sari store ug niabot ang suspek nga nagmotorsiklo nga nasuko kaayo.
Gikalalis niya ang biktima hangtod nga nibunot sa iyang gidalang armas. Nisuway sa pag-ilog sa armas ang naulahi apan nakahimo ang suspek sa pagpamusil.
Ang biktima gidali sa pagdala sa Mendero Hospital sa lungsod sa Consolacion apan nakabsan kini sa kinabuhi.
Ang suspek daling nisibat sakay sa iyang motorsiklo.
“Gibuwagan daw ni sa asawa unya dili man makadawat nga ilisan sa silingan. Nibahad nga puslan man daw nga biyaan sa asawa bawnon ni niya sa prisuhan,” dugang ni Rondina.
Nahibaw-an nga makadaghan na nga nangayo og abag ang biktima sa kapulisan human kanunay nga dapatan sa bana tungod sa selos.
Ang suspek gikatahong nasuko sa iyang asawa tungod sa giingong makadaghang higayon niya nga nasakpan nga dunay ka text, chat ug kaestorya sa selpon ang asawa.
Gibutyag ni Rondina nga ang suspek napriso kaniadto sa dakbayan sa Danao human nadakpan sa pagpamaligya og ilegal nga drugas. Nakagawas siya human nakabutang og piyansa sa kaso.
Ang biktima dunay duha ka dagko na nga mga anak sa iyang kapuyo kaniadto. (GPL)