Garcia: Ing Katapatan daralan na katamu king Panyulung (Sincerity leads us to Advancement)

“Ngana ning Nwan a Panginwang migsalita: O mambang nang Prita, ing talasuyu

ning kasakdalsakdalan a makasuglung king masampat a kararaptanan e na atatagmwan

ing pangalaso king labwad ayti o king pangdiwang labwad; ninu mang darapat mayap, Kanakung kakaluguran, e na asasambut ning karokan.

Ing matagumpe yogi, kaybat ding dakal a dakal a banwa ning tula king yatu

ring makayapang lelangan, mibait ya king lipi ring makayapang tau,

o king lipi ring mabanding mayakayan.

O mibabait ya king lipi ring talasuyu ning kasakdalsakdalan a bitasang matas

king kabyasnan. Tutung tune, ing beytan ayti malagad talaga king labwad ayti.

King pangabait antita, pabyayan nang pasibayu ing nwan a kamalayan king milabas

nang bye, at pakikwanan nang gawang lakwas pang panyulung bang dasnan ing ganap

a tagumpe, O anak ding Kuru.

Kapamilatan ning nwan a kamalayan king milabas nang bye, tambing yang mayayagyag karing tuntunan ning yoga—agyang e no pantunan deti. Ing mapangutang a talasuyu ning kasakdalsakdalan ayti, magsikap king yoga, tatalakad ya babo ding mapagmasusing tuntunan ding banal a kasulatan.

Dapot ampat ing yogi susuglung na ing sarili na king tapat a pamagsumikap king lakwas pang panyulung, mawawas king miyayaliwang karinatan, kanita lubusan, kaybat ding dakal,

a dakal a beytan king pamangawa, darasnan na ing kakataskatasang parasan.

Ing yogi lakwas yang makayapan kesa king mapangiling, lakwas makayapan

king mapanyibuk at lakwas makayapan king mabungang talagawa.

Inya pin, karing sablang kabilyan, magi kang yogi.

Karing sablang yogi, ing parating mamintu Kanakung kisnang kapanaligan,

sasamban na Ku king kasakdalsakdalang malugud a kasuywan,

yang pekamalapit a misanmetung Kanaku king yoga at yang pekamatas dili.”

~ Dalit ning Kakataskatasang Panginwan | Danga 6: Sunis 40-47

(The Song of God 6:40-47)

***

King sinulat nang Mateo, Dangka 5 at Sunis 8 makapasyag: “Nwan la ring dalise pusu uling akit de ing Dyos!”

Nanu ing kabaldugan na ning “dalise pusu”? Ing dalise pusu ya pin ing pusung tapat, alang nanu mang pamagkumwari at alang nanu mang kapamiraytan king arapan o gulutan ding aliwa at lakwas na king Apung Ginu. Uling agyang amulang mu la ring aliwa, e me malyaring mulangan ing Apung Ginu uling akakit Na ngan ing sablang kapagnasan tamu uli ning lubas tamu ngan karing mata Na. Buri na sabyan nita ala tamung aysalikut nanu man Kaya.

Ing katapatan mangabaldugan mu namang kapakumbaban anti king pangading katlu nang Ginung Gauranga: “Ninu man malyaring gumale karing Nwan nang Lagyu ning Ginu king mapakumbabang kabilyan ning isip. Daramdaman na lakwas yang mapanupaya kesa king impun tanaman; daramdaman na lakwas ya pang mababa kesa king are king dalan; alang nanu mang panamdam karing sablang maling dangalan; makadyang miyampang ing sablang kagalangan karing aliwa a e magnasang igalang da aring aliwa. King kabilyan antita ning isip malyari na lang igale ding Nwan nang Lagyu ning Ginu parati.”

***

Dake Talabaldugan:

1.minanig (pangdiwa) pinanig, kinampi, minayun o minye tangu o kapayntulutan king dapat o pasya ning ninu man. English – sided with someone or one’s decision, party or gave support to someone’s decision, proposal, palan or deed. Alimbawa king pamangamit: “Dakal a minanig king sadyang kadwang punbangsa dapot makapangasdan ing meging kelwalan ning pamamili da kanu reng memalen.”

2.minano (pangdiwa) minanu, mipakananu, ing milyari king ninu man o nanu man, (aske pakutang king tawling dake ning pamagsalita). English – Whatever happened? Alimbawa king pamangamit: “E la sukat mangasdan o bakit miras keng makanyan ing sadyang mayap a pamiyutuis da ring adwang mikaluguran a ren, balu nung minano?”

3.minanu (pangdiwa) minanu, mipakananu, ing milyari king ninu man o nanu man, (aske papasyag o pakutang mu naman dapot king dake mumuna ning pamagsalita). English – Whatever happened?. Alimbawa king pamangamit: “Minanu la kaya ding sadyang mayap a pamiyutus a mikaluguran o ba’t ngeni mipakanyan la rugu?”

***

DIPARAN, KASEBYAN at KABALDUGAN

Maralas dang sasabyan deng makatwa ing antini kanita: “Pekakaba mu man ing limbun--king kapupus--king pisamban pa mu rin malaus.”

Kabaldugan: Ing nanu mang bage agyang masulit at maging dalan ning kasakitan, alingasngas at sigalut--datang mu rin ing wakas na at meraklan salese mu rin nung panayan at pagtyagan e kagisanan pagasa. Maulagang sangkap niti ing mangadi kabang daraptan ing sukat daptan. E itang kabud na ka mangadi ala na ka mang gagawan bang dasan ing pakirasan.

Masasabi mu naman iti keng e da pamikasundu ding mikakapatad o mikakamaganak. Nung tuknangan ing e mayap a dapat at kapagnasan—datang at datang mu rin at misut la kabud manuman la ding sukat manuman, mamin king agawang kamalyan at manyawad kapatawaran ing ninu mang mikasala king ninu mang apanasakit kapanamdaman.

***

MIKANLAPIT KABALDUGANG AMANU TAMU

1.mibagwa – sumulung king kabyayan o king kabilyan a lakwas mayap o masaplala.

2.minono – pamanyulung manibat king kasakitan o kakalulwan palapit king kanawan o lakwas mayap a kabilyan.

3.numawa – milako ing kasakitan o kakalulwan.

4.mipasno – mengari mu naman king numawa, milako ing kasakitan o kakalulwan.

5.misaplala – sumulung kabyayan o malis king kakalulwan o kasakitan papunta king kanawan o panyulung kabilyan king bye.

6.misulung – sumulung o malis king kakalulwan o kasakitan papunta king kanwan o masaplalang bye.

7.miyangat – mitas kabilyan magmula king kakalulwan o kasakitan.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.