Mga bag-ong palit sa Philippine National Police nga tag-as ug mugbo nga kalibre sa mga armas gipang-apod-apod sa mga city ug provincial police office sa Central Visayas lakip na sa Regional Mobile Force Battalion. Kini kabahin sa programa sa gobiyerno sa pagpalambo sa ilang kagamitan.
Personal nga nibisita sa Police Regional Office 7 ang director sa Directorate for Logistics sa Camp Crame, Police Major General Ronaldo Alay, aron iyang pangulohan ang ceremonial turnover sa bag-ong mga kagamitan sa kapulisan.
Kini sama sa 533 ka caliber 5.56 basic assault rifle Galil Ace 22N, bala niini nga moabot sa 191,880 ka rounds, 300 ka units sa 9mm pistol Rex Delta, 10 ka caliber 5.56 light machine gun Negev ug usa ka Toyota Hilux patrol car.
Matod ni Olay nga gawas sa maong bag-ong mga armas nga mahatag sa matag police office sa Central Visayas, duna pay mosunod niini nga mao ang .50 caliber heavy machine guns alang sa RMFB ug sa PNP Maritime group.
Gipasigarbo ni Olay ang maong mga armas tungod kay ginama kini sa Israel ug sa wa pa nila dawata, niagi kini sa makuting field testing and evaluation kon unsa kini ka lig-on.
“I would like to proudly tell you that these are the products of our national headquarters bids and awards committee procurement. At yung mga baril na ito alam ba ninyo na bago natin in-accept, these firearms underwent field testing and evaluation lalong lalo na yung 20,000 rounds testing. Ibig sabihin bago namin tanggapin yan ay 20,000 rounds continuous firing yan. Ibig sabihin matibay siya,” matod ni Olay.
Awhag niya sa mga pulis nga maisyuhan niining mga armas nga ayuhon kini sa paggamit ug dili ipasagad nga bisan asa na lang ibilin hangtod nga mawagtang.
Matod niya nga apil na sa training sa police personnel nga ilhon ang ilang mga armas nga daw sama sa ilang asawa pinaagi sa pagpangga niini.
Hugot kini nga monitoron sa Camp Crame pinaagi sa bag-o nila nga sistema.
Ang mga unit sa kapulisan sa Central Visayas nga nakadawat sa maong mga bag-ong gamit mao ang Regional Headquarters, Cebu City Police Office, Cebu Police Provincial Office, Lapu-Lapu City Police Office, Mandaue City Police Office, Siquijor Police Provincial Office ug Regional Mobile Force Battalion.
Una nang nahatagan ang Negros Oriental sa dihang nibisita ang kadagkoan sa Camp Crame sa maong probinsya ug PRO 7.