Ang Kapitolyo molusad og re-appraisal sa real properties nga nahimutang Probinsiya sa Sugbo nga magsugod sa mga lugar nga malambuon diin nagbarog ang mga establisemento, partikular sa Metro Cebu area.
Si Gobernador Gwendolyn Garcia nipatawag og tigom kauban ang mga representante sa independent private appraisers aron maoy motabang sa Kapitolyo niadtong Lunes, Marso 20, 2023.
Ang gobernador nagkanayon nga ang private appraisers maoy moila sa unang 10 ka dagkong commercial establishments apil na ang mga hotel, malls ug lima ka mga nanag-unang industrial company sa lalawigan sa Sugbo.
Tuyo sa pag-tap sa Kapitolyo sa private appraisers mao ang pagsuta sa fair market value sa mga commercial ug industrial establishments.
Ang Cebu Provincial Government gikatakdang molagda og memorandum of agreement uban sa private appraisers nga gilangkuban sa Cuervo Appraisers, Asian Appraisal, ug AA+ Appraisal Inc.
Ang listahan sa mga business establishment nga gihatagan og permit gikan sa buhatan sa mayor maoy magsilbi nga giya sa mga private appraiser sa reappraisal mapping.
Lakip sa mga establisemento nga rumbohon sa private appraisers, gawas sa malls ug hotels, mao ang resorts, restaurants, subdivisions ug amusement and recreational centers.
Gikuha ni Garcia ang serbisyo sa mga pribadong appraiser bisan pa kon gihatagan niya og tulo ka buwan nga ultimatum ang tanang assessors sa 44 ka mga lungsod sa probinsiya nga mosumiter og mas tukma nga reappraised value sa mga real property sa tanang commercial firms sa ilang tagsa-tagsa ka lokalidad.
Gilusad sa gobernador ang reappraisal sa mga real property sa probinsiya isip usa sa mga prayoridad sa iyang administrasyon aron madugangan ang koleksyon sa buhis sa Kapitolyo aron mapundohan ang mga programa ug proyekto.