Siyam ka dagkong mga fraternity sa Metro Cebu nipirma sa pledge of commitment pagsuporta sa Republic Act 11053 kun Anti-Hazing Law atol sa gipatawag nga meeting uban sa kadagkoan sa kapulisan sa dakbayan sa Sugbo nga gipahigayon sa Capitol Social Hall sa Cebu Province.
Kini naumol human sa kamatayon sa usa ka tinun-an sa University of Cebu niadtong Disyembre 2022 resulta sa hazing nga gihimo sa Tau Gamma Phi fraternity.
Ang mga fraternity nga mitambong sa maong tigom mao ang Alpha Phi Omega, Tau Gamma Phi, Alpha Kappa Rho, Scouts Royale Brotherhood, Beta Gamma Rho, Alpha Sigma Phi, Gamma Phi Sigma, Upsilon Phi Sigma ug Alpha Phi Epsilon.
Matod ni Police Lieutenant Colonel Maria Theresa Macatangay, information officer sa Cebu City Police Office, nga ilang gituki ang mahitungod sa Anti-Hazing Law diin misangpot sa hiniusang baruganan sa tanan ang pagkondinar sa mga organisasyon nga mohimo pa og hazing ngadto sa ilang mga neophyte.
Ningsanong usab ang kapin sa 100 ka mga miyembro sa siyam ka mga fraternity nga ningpirma sa pledge of commitment sa pagsuporta sa maong balaod ug sundon ang nalatid niini aron dili na masubli ang nahitabo sa tinun-an sa UC.
Nasabotan usab sa maong tigom nga mag-umol sila og inter-fraternity and sorority council diin ang mga opisyal niini maoy mag-monitor sa tanang mga chapter nga mohimo og initiation rites nga maoy tradisyon sa matag fraternity.
Kini aron pagsiguro nga walay molapas sa balaod sama sa pagbunalbunal sa paa, pasakit sa lawas ug psychological nga abuse sa ilang neophytes.
“This council will sort of become a monitoring council of each of the fraternities and sororities conduct of initiation rites, not that they will be present during the initiation rites but sort of to insure that everyone is onboard,” matod ni Macatangay sa Marso 21, 2023 nga interbyu sa mga tigbalita.
Dunay kapin sa 100 pa ka mga fraternity sa Metro Cebu nga naa sa mga dagkong unibersidad nga awhagon sa kapulisan nga mosalmot sa hiniusang programa aron nga matunhay ang ilang mga kalihukan.
Samtang gipahibawo ni Macatangay nga karong adlawa, Marso 22, 2023, ipasaka na ang kasong murder batok sa pito ka mga miyembro sa Tau Gamma Phi nga responsable sa kamatayon ni Ronnel Baguio.