Bana nga nipusil patay sa iyang asawa bolontaryo nga nitahan sa Martes sa buntag, Marso 21, sa headquarters sa 1st Provincial Mobile Force Company (PMFC) sa Cebu Police Provincial Office sa Barangay Lahug, dakbayan sa Sugbo.

Si Sidney Bacalla Toledo, 40, taga Barangay Poblacion, lungsod sa Compostela, nisurender human nagtago-tago human niya gipusil patay niadtong Lunes, Marso 20, ang iyang asawa nga si Evielyn Suarez Toledo, 40, gumikan sa selos.

Si Police Staff Sargeant Daryl Rondina, imbestigador sa Compostela Police Station nga nahinabi sa Superbalita Cebu, nagkanayon nga human sa krimen, ang suspek nagtago-tago sa lungsod sa Compostela.

Sumala pa nga adunay higala sa suspek ang nakatambag kaniya hinungdan nga nakahukom siya sa pagtahan.

Nagkanayon si Rondina nga giangkon sa suspek ang krimen tungod sa iyang pagpangabubho kang Evielyn.

Ang suspek wala motug-an kon si kinsa ang lalaki nga ilang silingan nga matod pa nalambigit sa iyang asawa.

Tug-an ni Toledo nga human niya pusila ang iyang asawa, siya nisibat dala ang P2,000 nga diha sa bag sa biktima, kinsa nagbantay sa tindahan niadtong higayona.

Ang revolver nga gigamit sa pagpusil wala na makuha sa kapulisan kay matod pa gilabay sa suspek.

Inay nga makaamgo o magmahay ang suspek sa pagpatay sa iyang asawa, wa kini matandog.

“Wala man daw siya magmahay, wala sab siya masakiti. Iyahang gi-offer ang patayng lawas sa asawa ngadto sa lalaking gikarelasyon,” asoy ni Rondina base sa saysay ni Toledo atol sa imbestigasyon.

Gipadayag ni Rondina nga daw nalipay ang suspek nga namatay ang iyang misis. (GPL)