Sugod karong adlawa, Marso 22, dili na motuman ang mga lokalidad sa probinsya sa Sugbo sa color-coding nga paagi sa pag-ila sa African swine fever (ASF) affected areas.
Kini maoy gianunsiyo ni Cebu Governor Gwendolyn Garcia atol sa One Cebu consultative meeting labot sa ASF ug ubang swine diseases, management ug monitoring sa Marso 21, 2023. Gawas niini, gilibkas na usab sa gobernador ang tanang border controls sa tanang lokalidad sa lalawigan.
“I will no longer allow color coding within the Province of Cebu. We will lift all border controls,” pahibawo ni Garcia.
Si Garcia nagkanayon nga dili na niya tugotan ang Bureau of Animal Industry (BAI) sa pag-test sa mga baboy sa probinsya.
“Ngano man mag testing man ko? Ngano kinahanglan man ta mahibawo ASF ba ni o cholera? I am not trying to doing this para I can thumb my nose up at DA. I am trying to do this because I hope that there will be a change of policy sa DA. Nga kon maaprobahan nato, naa tay imperical data from the field gyud. Kaning mga symptomatic pag-testing mogawas nga cholera ni, preventable ang cholera. I hope this will change the policy of DA nga now focused on the prevention of cholera by the massive vaccination of our hogs,” matod ni Garcia.
Apan ang mga municipal agriculture officers o veterinarian officers sa lalawigan sa Sugbo gitugotan nga mokuha og samples aron ma-test kini pinaagi sa pakig-alayon sa diagnostic service nga Primecare.
Gipasabot atol sa tigom nga dunay kapasidad ang mga doktor sa maong diagnostic ug laboratory service sa pag test ug pag analyze sa datos ug resulta nga makuha niini. Ang Primecare makig-alayon usab sa Provincial Veterinary Office para sa ilang ekipo nga gamiton usab sa pag test sa mga baboy.
Aron kini mapatuman, gimandoan ni Garcia ang tanang local chief executives sa pagpadala sa Swine Fever Task Force (SFTF) nga maglangkob sa mga barangay health aid (BAHA) abagan sa barangay kapitan, municipal agriculture o city veterinarian alang sa subsob nga monitoring nga himuon ngadto sa mga baboy sa barangay.
Isip suporta, mohatag si Garcia og tag P1 milyon ngadto sa mga mayor aron magamit sa pagpahigayon og monitoring ug pag-disinfect sa mga baboyan sa ilang lokalidad.
Gawas niana, may ihatag usab nga mga Personal Protective Equipment (PPEs) ang Kapitolyo nga magamit sa monitoring teams sa matag LGU. Ang mga PPE ug masks nga ihatag gikan sa kaniadto sobrang supply niini nga alang sa mga hospital ug frontliners sa probinsya.
Samtang subay sa pagpaluag nga gianunsyo, gitugot na usab ang pag-ihaw og baboy sa mga accredited slaughterhouses ingon man ang pag-transport niini sa ubang lokalidad sa probinsya sa higayon nga adunay saktong dokumento sama sa Animal Health Certificate ug laing certificate pagtugot sa veterinarian sa probinsiya.
Sa maong higayon, nipadayag usab og suporta si Department of Agriculture (DA) Central Visayas Regional Executive Director Angel Enriquez ngadto sa probinsya sa Sugbo. Sukwahi kini sa unang gipahibaw sa buhatan nga mopadayon sila sa pagtuman sa lagda sa kaulohan kalabot sa pagpugong sa pagkuyanap sa ASF sa Sugbo.
“We are in support...to be very honest what the Cebu province is doing right now would be an eye opener to all the provinces and even to the Bureau of Animal Industry. Why is that? We all know that the policy has been there since 2019 but we all know that Science is also very dynamic so this is the ample time to reconsider and reevaluate the protocols that has been there,” matod ni Enriquez.